Talisay City admin mo-resign

CEBU, Philippines – Gihimakak ni City Administrator John Yre de los Reyes nga nagkaguliyang ang partido sa iyang amahan nga magpapili pagbalik pagkamayor sa siyudad sa Talisay hinungdan nga siya giawhag nga pakanaugon sa iyang katungdanan.

Matud pa niya nga way kamatuoran ang nanggawas nga report. Ug gani wa ‘sab siya’y kalibutan sa estado sa iyang uyoan nga si James de los Reyes. Matud pa niya gusto sa amahang si Mayor Johnny de los Reyes ug sa grupo niini nga siya mokanaog siya sa posisyon aron ma-pokus sa iyang pagka-campaign manager sa ilang partido.

“Maoy gusto sa grupo nga akoy tigpamaba ni mayor pareha gud sa previous nga administrasyon pero wala lang ‘to siya mo-resign," matud pa ni Yre.

Siya nagkanayon nga dili lang una siya mo- enroll sa sunod semester alang sa kursong abogasya aron matutokan niya ang kampanya.

Gikatakda siya nga mokanaog sa pwesto karong buwan sa Pebrero.

Sa nasayran nga si Atty. Alfredo Sipalay una nang nitug-an nga misugot nga makapares isip kandidato pagkabise mayor ni JVR sa kondisyon nga mo-resign si Yre ug James sa ilang posisyon.

Hinuon wala mohatag og detalye si Sipalay sa rason nganong nangayo siya niini nga kondisyon.

Sa nasayran, susama gihapon nga kondisyon ang gipangayo ni Sipalay aron iyang dawaton ang pagka-tsirman sa Bids and Awards Committee.

Kini human si JVR ug Yre ang napasakaan og kasong graft and corruption sa buhatan sa Ombudsman. - /EIM) (BANAT NEWS)