Nag-wheelchair nakadumbol gitigbas
CEBU, Philippines – Natigbasan ang lalaki nga nagsakay og wheelchair human nga iya’ng nadumbolan ang botelya nga giinom sa grupo sa mga lalaki pasado alas 6 sa gabii niadto’ng Biyernes sa San Rafael, Barili.
Ang natigbasan naila nga si Noven Clarin, 24, taga Borbon samtang ang nakatigbas naila nga si Placido Cañete, 53, molupyo sa San Rafael, Barili.
Si Senior Police Officer 2 Heinie Aspera, desk officer sa Barili Police Station, niingon nga ang suspek kauban sa iya’ng mga higala nga nag-inom sa ila’ng balay.
Naabaot ang biktima sa balay sa suspek ug nadumbolan sa iya’ng wheelchair ang giinom sa suspek ug nayabo sa yuta hinungdan sa iya’ng kapungot.
Nasuko og maayo ang suspek ug iya’ng gikasab-an ang biktima hinungdan sa ila’ng mainiton nga panaglalis.
Apan wala natagbaw ang suspek nisulod siya sa iya’ng balay ug nagkuha og sundang dayung hapos niini sa lawas sa biktima sa makapila ka higayon.
Niadto’ng higayuna, si PO2 Dan Villardar sa Barili Police Station padulong na unta mouli sa ilaha sa sikbit nga barangay sa San Rafaela apan iya’ng nabantayan ang kaguliyang hinungdan nga iya’ng gisusi.
Nagpakitabang niya ang biktima nga naigo sa sundang ug iya’ng gidakop ang suspek ug gikompiskar ang sundang nga nagkadugo pa.
Gidala ni Villardar ang suspek sa presinto samtang ang biktima gidala sab sa Barili District Hospital aron matambalan sa iyang samad tinigbasan. - /GMR) (BANAT NEWS)
- Latest
