Mga badlungong polis gibaharan

CEBU, Philippines – Misaad ang bag-ong hepe sa kapolisan sa dakbayan sa Naga nga iyang limpyohan gikan sa mga badlungon ang iyang mga sakop aron mas katuohan sila sa paghimo sa ilang trabaho sa katilingban.

Kini maoy gipamahayag ni Superintendent Jovito Canlapan, kinsa bag-ong nilingkod nga hepe sa maong dakbayan.

Matud pa ni Canlapan nga daghan iyang mga plano ug programa nga ipatuman apan sa di pa kini niya buhaton iyang unahon og hashas iyang mga sakop.

Gusto ni Canlapan kadtong pulis nga motrabaho sa tinarong ug mutabang kaniya sa pagsugpo sa tanang matang nga ilegal sa maong dakbayan.

Si Canlapan ang nag-courtesy call na ni Mayor Valdemar Chiong ug ang mayor nihangyo kaniya sa paghimo og mga programa nga maminusan ang mga krimen sa ilang lugar.

Si Chiong mihatag og opisina sa kapulisan ug uban pa nilang kagamitan.

"I-work out pa nato ang atong working environment sa atong mga sakop kay bag-o pa man gyud mi nag-uban nila," matud pa ni Canlapan.

Ang kapolisan sa dakbayan sa Naga adunay 57 ka polis ug plano ni Canlapan nga i-maximized sila kontra sa problema sa drugas, pagbutang og mga pulis diha sa kadalanan ug ang paghimo’g mga plano kun unsaon pagmenus sa disgrasya sa mga sakyanan.

Aron madugangan ilang pwersa, gusto ni Canlapan nga mag-organisar og force multipliers aron makatabang kanila sa mga operasyon.

Si Canlapan mao ang mihulip ni Supt. Ricky Delilis human sa kapistahan sa Naga niadtong Oktubre 10.  Si Delilis gihulipan tungod kay wa matagbaw si provincial police director Sr. Supt. Noel Gillamac sa iyang performance. - /EIM) (BANAT NEWS)