Mga tambalanan pabutangan og fast lanes sa senior citizens

CEBU, Philippines – Gihangop sa mga sakop sa Senior Citizens sa Dakbayan sa Sugbo ang laraw ni Mayor Michael Rama nga mobutang og mga fast lanes diha sa mga pribado ug publikong tambalanan alang sa mga tigulang nga mangasakit aron dali ra silang maatiman.

Matud pa ni Warner Gayo, usa sa mga senior citizens sa dakbayan sa Sugbo  dako kaayong tabang kanilang mga edaran kung adunay fast lanes kay dili na man unya sila magpaabot ug molinya sa mga hospital nga posibleng ilang adtoan.

Sumala pa ni Gayo , nakasuway na usab hinuon siya nga dali ra silang giatiman sa iyang asawa sa usa sa mga tambalanan dinhi sa siyudad ilabi na pareha silang duha nga senior citizens.

Ang pangulo sa Office of the Senior Citizens Affairs, Doming Chavez malaumon nga madayon ang plano sa mayor sa daling panahon.

Gibutyag ni Chavez nga dili tanang hospital sa siyudad ang dunay fast lanes alang sa mga senior citizens. (Rowena D. Capistrano/EIM)

200 ka tinun-an nalibre sa vocational course

Dul-an sa 200 ka mga kabus nga mga batan-on sa probinsiya ang nakabenepisyo sa Training for Work Scholarship Program (TWSP).

Ang kagamhanan sa probinsiya ug Technical Education and Skills Development Authority (TESDA) nipaubos og 189 ka mga batan-on sa maong programa sugod niadtong Oktubre 1 ug 9, 2015 sa dakbayan sa Carcar ug lungsod sa Argao.

Ang una ug ikaduhang batch nga scholars maoy misaksi sa pormal nga paglusad sa TWSP.

Ang tumong sa TWSP mao ang pagpuno sa kakuwang og skilled workers sa industriya nga gikinahanglan naa niini nga matang sa trainings.         

Adunay 137 ka scholars gikan sa dakbayan sa Carcar, mga lungsod sa Argao, Alcoy ug dakbayan sa Naga ang gipaubos sa 35 ka adlaw nga training kabahin sa motorcycle ug small engine servicing diha sa College of Technological Sciences-Cebu (CTS-Cebu).

Ang CTS-Cebu maoy gikuha sa TESDA aron motudlo sa technical vocational institute sa TESDA.

Samtang ang 25 ka scholars sa lungsod sa Malabuyoc tudloan kabahin sa electrical maintenance ug installation diha sa University of Cebu (UC) samtang laing 27 ka scholars gikan sa dakbayan sa Naga ang tudloan kabahin sa dressmaking sa Provincial Training Center (PTC) sa lungsod sa Samboan.

Ang mga kurso gipili kini base sa mga skills nga gikinahanglan sa mga target area.  Ang community development assistance maoy nanghipos og mga kasayuran kabahin sa gipangita nga mga trabahante.

Ang kagamhanan sa probinsiya mihangyo sa TESDA alang sa mobile training centers aron dili maglisod ang mga estudyante sa pamelete nga maoy usa sa nakitang hinungdan nganong daghan ang wala makasustinir sa training bisan pa og libre kini.  (BANAT NEWS)