Kapin sa P.5M shabu, armas nasakmit

CEBU, Philippines –  Kapin sa tunga sa milyon ka pesos ang kantidad sa shabu nga nasakmit sa managlahi nga operasyon sa kapolisan sa dakbayan ug probinsiya sa Sugbo.

Usa ka 35-anyos nga lalaki nga nagtingkagol sa prisohan human nakuhaan og kapin sa P100 mil nga kantidad sa gituohang shabu ug armas sa barangay Talamban, dakbayan sa Sugbo sa niagi’ng hapon.

Si Nicorito “Toy” Bontilao, taga sitio Nasipit sa mao’ng barangay, ang napusasan sa mga operatiba sa Talamban Police Station sa pagbaligya sa gidudahang ilegal nga drugas sa usa ka police poseur buyer.

Matud ni PO2 Lorencio Cabanlit, desk officer sa Talamban Police, nga ang operasyon gihimo human sila nakadawat og tawag  gikan sa usa ka concerned citizen niadtong Huwebes sa hapon mahitungod sa usa ka gihinganlan og “Toy” nga namaligya og ilegal nga drugas sa ila’ng lugar.

Dali nga niadto ang Anti-Illegal Drugs Special Operations Task Group nga gipangulohan ni Alvin Llamedo alang sa buy-bust operation.

Apan matud ni Cabanlit nga sa pag-abot sa kapolisan, nakita na sa distansya’ng lugar si Bontilao nga namaligya og pakete sa gituohang shabu sa mga batan-on. Tungod niini, usa sa polis niapil usab sa pagpalit og ilegal nga drugas.

Atol sa pagtunol ni Bontilao og gamay nga pakete sa gituohang shabu ug pagdawat sa P200, siya gidakop sa kapolisan ug  nakuha pa gyud ang tulo ka medium nga pakete sa shabu ug usa ka kalibre .22 magnum nga adunay upat ka bala.

Ang gituohang ilegal nga drugas mikantidad og mga P177 mil base sa Dangerous Drugs Board nga balor.

Matud ni Cabanlit nga sa diha’ng maghimo na unta og inventory ang kapolisan sa mga ebidensya, kalit lang nihamag ang ubang silingan ni Bontilao aron makabuhi ang suspek ug ang uban nanglabay pa og bato sa kapolisan.

Apan wala’y nabuhat ang mga silingan ni Bontilao tungod kay gilahos na lang kini og dala sa presinto ug didto na lang gibuhat ang inventory.

Danao City

Samtang ang City Anti-Illegal Drug Operation Task Group (CAIDSOTG) nga gipangulohan ni Police Officer 3 Fiel Restauro ang nagpahigayon og buy-bust operation sa sitio Pag-utlan, Maslog, dakbayan sa Danao ug ila’ng nadakpan ang lima ka tawo ug nasakmit usab nila ang mokabat sa P239,776 nga kantidad sa shabu alas 6 pasado sa niagi’ng Biyernes sa gabii.

Si Restauro niila sa mga nadakpan nga sila si Carlos Rosento Baclado, 39; Wendelyn Olivar Calderon, 26; Larry Boy Noya Lucero, 44; Ronilo Jayme Baco, 34 ug Alvin Doroy Ponce, 22, nga pulos nagpuyo sa mao’ng dapit. Matud ni Restauro nga ang suspek nga si Baclado mao’y ila’ng target sa buy-bust nga gisugdan ala una pa ang takna sa hapon niadto’ng Biyernes.

Ang ila’ng poseur buyer maoy nakigsabot kang Baclado nga mopalit og shabu hinungdan nga gitunol sa suspek ang shabu bugti sa P750 nga marked money hinungdan nga dali kini’ng gisignit.

Nunot sa pagkasikop sa mga suspek, ila’ng nasakmit ang mokabat sa 20.14 gramo nga gidaghanon sa shabu nga nagkantidad og P239 mil kapin.

Liloan

Samtang mokabat usab sa P100,000 kapin nga kantidad sa shabu ang nasakmit sa kapolisan gikan sa tulo ka tawo nga nadakpan sa akto nga naghupot niini sa sitio Cogon, Catarman, lungsod sa Liloan alas 6 pasado   ang takna sa niagi’ng  gabii.

Si Senior Inspector Ramil Morpos hepe sa Liloan Police Station niila sa nadakpan nga sila si Adonis Tagalog Paradiang, 43, taga Purok Repulyo, Cogon Landing, Catarman ug Arman Normadia, 22, taga Lower Looc, Calero sa mao gihapon nga      lungsod.

Matud pa ni Police Officer 3 Jesson Gayo sa Liloan Police Station nga nakadawat sila og pahibawo gikan sa nagpakabana nga molupyo labot sa nasigpatan nga grupo sa mga lalaki nga nagsuyop og shabu.

Kini ang hinungdan nga si Morpos ug kaubanan ang nagdali sa pagsusi apan diha’ng nahiabot sila may nakasinggit og dagan kay naay mga polis.

Nagdinaganay ang grupo sa mga lalaki sa pagpanggawas sa panimalay agi sa luyo’ng pultahan apan ang duha nga sila si Paradiang ug Normadia nga wala makalihok sa gilingkoran mao gyud ang ila’ng nadakpan.

Nunot sa ilang pagkasikop mao’y nasakmit gikan sa mga dinakpan ang upat ka gagmay nga pakete ug duha ka dagku nga pakete nga ang tanan ila’ng gibanabana nga mokabat sa P100,000 nga kantidad sa shabu.

Asturias

Samtang nasikop sa kapolisan ang usa ka suspetsado’ng drug pusher human nga gi-implementar ang search warrant pasado alas 6 kagahapon sa buntag sa sitio Tapon, Poblacion, lungsod sa Asturias.

Ang lalaki naila nga si Jonathan Mahilom nga gituohang usa ka level three drug pusher nga makabaligya og 50 gramos nga shabu matag buwan.

Si Senior Inspector Narciso Abapo, hepe sa Asturias Police Station, niingon nga ang search warrant gi-isyu ni Judge Hermes Montero sa RTC Branch 59 sa Toledo      City.

Ang operasyon resulta sa tulo ka semana nila nga surveillance operation diin napalitan gyud nila sa makaduha ka higayon sa pagpahigayon nila og test buy. Kagahapon sa sayo’ng buntag samtang natulog pa ang suspek gi-implementar ang search warrant aron nga maseguro nga naa gyud sa balay ang  suspek.

Gisikaran sa usa ka operatiba ang pultahan nga mao’y nakapakugang sa suspek ug padulong na unta kini’ng mokupot sa iya’ng pugakhang apan napugngan siya sa mga polis.  Matud ni Abapo nga nitug-an niya ang suspek nga gi-alimungawan siya sa kalit nga pag-abli sa pultahan.

Nakuha sa mga polis gikan sa suspek ang usa ka medium pack ug 20 ka gamay nga pakete sa gidudahang shabu, P1,600 nga kwarta, pugakhang ug lima ka bala.

Ang mga nakompiskar nga drugas mobalor og P77,880 base sa DDB nga balor. (Ma. Fatima R. Secuya, Romeo T. Limpangog ug Bryner L. Diaz/GMR)  (BANAT NEWS)