Free Wifi Zone tinguha ni Garcia

CEBU, Philippines –  Usa sa tinguha ni kanhi kongresista Pablo John (PJ) Garcia ang libre’ng wifi zone sa mga lungsod nga sakop sa ika-pito nga distrito diin siya magpapili sa pagka-kongresista ubos sa One Cebu Party.

Ang mga lungsod gilangkuban sa Dumanjug, Ronda, Moalboal, Badian, Alcantara, Alegria, Malabuyoc ug Ginatilan.

Gawas sa pagbutang og usa ka wifi zone sa matag lungsod lakip sa iyang plata porma mao ang pagpanday og balaud sa pagpauswag sa environmental protection ug enhancement sa Tañon Strait.

Kabahin sa panglawas, buot niya’ng i-promote ang libre’ng pre-natal health care sa mga inahan ug sa unborn sa distrito pinaagi sa monitoring ug incentives system, nutrition ug culinary training alang sa mga inahan ug magtutudlo sa publiko’ng eskwelahan, pagpagahin og dugang pundo alang sa kaugmaran sa kadalanan, tulay, water systems, ug rural electrification, pagpauswag sa internet connectivity sa mga publiko’ng eskwelahan, pagpauswag sa mga libraries, science laboratories ug speech laboratories sa elementarya ug high school sa mga publiko’ng eskwelahan.

Subay niini, si Bokal Peter John Calderon sa Liberal Party nga kaatbang ni Garcia nagkanayon nga padayunon niya ang proyekto’ng nasugdan na ni Kong. Wilfredo Caminero lakip sa pagpaayo sa mga karsada sa kalungsuran ilabi na sa kabukiran.

Matud niya nga ang mga tawo sa kabukiran mao’y labi’ng nagkinahanglan og tabang sa gobiyerno.

Dugang ni Calderon nga sayon na lang ang pagdala sa abot sa mga mag-uuma ngadto sa kamerkaduhan ug sa mao’ng sistema ang kita usab sa mga mag-uuma mosaka tungod kay sila na man ang direkta’ng makapamaligya sa ila’ng abot.  (BANAT NEWS)