27 naluwas, rescuer napungkol

CEBU, Philippines –  Di momenos sa 27 ka pasahero ug tripulante sa usa ka motorized banca ang naluwas sa duha ka barko nga nakalabay niini kagahapon sa buntag diha sa kadagatan taliwala sa Cebu ug Bohol, apan usa sa mga rescuers ang naputlan og tiil human nalambod kini sa pisi atol sa operasyon.

Ang naputlan og tuo nga tiil mao si Rudyard Payusan, 48, chief mate sa LCT Golden Crescent matud pa wala makabantay nga nalambod sa iyang tiil ang pisi ug nabira kini samtang nag-rescue sa mga biktima.

Na-rescue mao sila si Marissa Otara, 42; Gaudisia Largo, 52; Elping Torreon, 65; Achilito Rabadon, 37; Kany Torifel, 48; Marilyn Almacin, 48; Nilo Torion, 48; Rodrigo Oligao, 50; Danielita Gabison, 40; Danilo Paterna, 50; Julito Pano, 34; Raffy Misig, 12; Cocoy Daan, 44; Neboy Cabanoba, 35; Josephine Abenasa, 45; Jomar Mabuyo, 25; Carmelita Mihiyas, 60; Abunia Cabantay, 61; Gorgonia Cañete, 65; Pedrosa Torreon, 59; Junior Badal, 38;  nga mga pasahero sa M/B Mansan nga na-rescue sa M/V Filipinas Dinagat sa Cokaliong Shipping Lines.

Samtang sila si Norberto Aparici, 41, kapitan; ug ang mga tripulante nga sila si Saturnino Abapo, 46; Jushua Mark Abapo, 23; Antonio Cabantogan, 43; Joseph Mark Simacon, 25; ug Vernie Torion 23, natanggong karon sa Waterfront Police Station tungod kay adunay himuong imbestigasyon ang Philippine Coast Guard.

Anad bisan may habagat

Sumala pa sa tripulante nga si Saturnino Abapo nga naanad na sila nga mobeyahi bisan og dunay hanging habagat tungod kay makasugakod ang ilang motor banca sa hangin ug balud.

Gawas pa niana taas pa ang lutaw sa ilang kasko sa wala pa sila molarga pasado alas 9 sa Biyernes sa gabii gikan sa Isla Kalitoban, sa Talibon, Bohol.

Karga sa motorized banca ang mga goso, lato, isda ug kinhason nga itumod unta sa mga pasahero niini ngadto sa Pasil.

Matud pa ni Abapo, kalit lang mikabos ang nylon nga gihigot sa tarik sa motorized banca ug sa pag usdak-usdak sa banca nalunod gyud ang ilang gisakyan.

Si Hadelin Torreon, anak ni Pedrosa, miingon nga gitawgan siya sa inahan sa tungang gabii niadtong Biyernes apan wala niya matubag.

Nabalaka na siya kun unsay nahitabo sa iyang inahan kay wala man gyud modunggo ang iyang gisakyan apan gipahibalo na lang siya sa ilang suki nga tigkomprahan sa goso nga nalunod ang gisakyan sa iyang inahan.

Matud pa ni Abapo nga sa ilang pagkalunod ilang gisiguro ang mga babaye aron dili kaayo sila tugnawon apan miabot pa g’yud og pito ka oras nga nagpautaw-utaw sila sa dagat una pa sila naagian sa LCT Golden Crescent.

Naputla’g tiil

Apan usa lang ang na-rescue kay ang chief mate sa LCT Golden Crescent l nga si Payusan nadisgrasya samtang nisuway og salbar kanila.

Swerte nga naagi usab ang MV Filipinas Dinagat nga mitabang sa pagtiwas og rescue sa mga tawo diha sa tubig.

Si Arnold Arado, sa M/V Filipinas Dinagat miingon nga bisan sa kadagko sa bawod ug kusog ang hangin gimando sa ilang kapitan nga si Joel Villanueva nga luwason ang mga naglutaw sa dagat.

“Lisod kaayo, kay mopaduol na mi sa mga naglangoy mapadpad na man sad mi unya mapadpad na man sad sila,” sumala pa ni Arado.

Bisan og naa ra sa ilang duol ang mga naglutaw sa dagat, naabtan sila og kapin duha ka oras paghaw-as kanila lakip na ni Payusan.  

Si Chase Cokaliong, vice-president for fleet operations ug HRD sa Cokaliong Shipping Lines miingon nga gihatagan dayon nila og init nga kape, instant noodles ug tubig ang mga naluwas aron malikay sa hypothermia.

Sa pag-abot sa Pier 1 sa M/V Filipinas Dinagat, ang mga naluwas maoy unang gipakanaog sa barko ug una nga gikuha si Payusan ug gidala sa usa ka pribadong tambalanan.

Samtang ang mga pasahero gipahimutang sa mga sakop sa City Disaster Risk Reduction and Management Council sa usa ka Kaoshiung Bus aron mapaubos sa stress debriefing.

Matud pa ni Dr. Esther Concha sa Department of Social Services sa Cebu City nga gusto sa mga pasahero nga adto sila ihatod sa Pasil.

Crew, tag-iya kasohan

Apan ang mga tripulante sa nalunod nga M/B Mansan gidala sa buhatan sa coast guard ug nasayran sa Banat News pinaagi ni SPO1 Aaron Pescadero, desk officer sa Waterfront Police Station nga gitanggong karon ngadto sila aron pasakaan og kaso.

Si PCG-7 Chief of Staff, Commander Weniel Azcuna, nagtuo nga dili rehistrado ang maong motorized banca sanglit nibiyahe kini og gabii nga gidili nga buhaton kay sa adlaw lang pwede mobyahi ang  mga motorized banca.

Tungod niini pasakaan og kasong reckless imprudence resulting to physical injury ang mga tripulante ug crew sa M/B Mansan lakip na ang tag-iya niini.

Kadaghan na nakaluwas

Niadtong 2010, ang M/V Filipinas Iloilo miguyod sa M/V Georich sa George and Peter Lines nga may sakay nga 500 ka pasahero ug crew samtang sa tuig 2011 ang M/V Filipinas Cebu mi-rescue ‘sab sa M/V Asia Malaysia sa Trans Asia Shipping nga may 110 ka pasahero ug 45 ka tripulante nga mao hinungdan nga gihatagan og award ang Cokaliong Shipping Lines sa 110th Founding Anniversary sa Philippine Coast Guard.  (BANAT NEWS)