Dagkong partido nakaduso na og COCs

CEBU, Philippines - Duha ka mayor, tulo ka bise mayor ug 24 ka mga konsehal maoy magtigi unya sa posisyon diha sa dakbayan sa Mandaue subay sa naduso sa ilang Certificate of Candidacy (COC) sa buhatan sa Commission on Election (COMELEC). Kini kun way matangtang kanila human sa ipahigayong paghashas sa mga kandidato nga himuon sa Law Department sa Comelec samtang nagkaduol ang campaign period sa sunod tuig.

Adunay upat ka mga independente nga nagpapili alang sa pagkakonsehal nga naglakip nila ni Edgar Cortes, Ricardo Mendoza, Silvirio Toring ug Frank Tanotan.

Sa One Cebu nga ubos sa line up ni Konsehal Emmarie Lolypop Ouano-Dizon nga maoy kandidato sa pagkamayor mao sila si Elmer Cabahug, Cesar Cabahug, Erwin Heyrosa, Emiliano Rosal, Procopio Villanueva, Malcolm Sanchez, Editha Montesa, George Mendoza, Benjamin Basiga ug Eduardo Monzanto.

Samtang sa line up ni Kongresista Gabriel Luis Quisumbing sa Liberal Party ang  mga konsehal mao sila si  Demetrio Cortes Jr., Atty Nenita Layese ug Elsetone Dabon,  Cynthia Remedio,  Carmelino Delmar Jr., Leo Jabas, Atty Olin Seno, Marvin Soco,  Alfonso Albaño ug Raul Kevin  Cabahug.

Samtang tulo ang nakaduso sa ilang COC alang sa pagkabise mayor sa dakbayan alang sa 2016 election ug kini naglakip kanila ni Carlo Fortuna,  Bethoveen Andaya ug Estaneslao Sanchez Jr. kinsa miduso usab sa iyang COC  sa katapusang adlaw  kagahapon.

Sa Cebu City, ang dominanteng duha ka lokal nga partido nga Team Rama ug Bando Osmeña Pundok Kauswagan gihapon maoy magtigi sa umaabot nga piniliay dugang ang pipila ka mga kandidatong independente.

Base sa record sa Comelec-Cebu City kagahapon, sila si Mayor Michael Rama ug Bise Mayor Edgardo Labella sa Team Rama atbangan nila ni kanhi kongresista Tomas Osmeña ug Konsehal Nestor Archival.

Samtang mag-atbang sa pagkakongresista sa norte sila si Kong. Raul del Mar ug kanhi mayor Alvin Garcia ug sa south district mao sila si Kong. Rodrigo Abellanosa ug Konsehal Gerardo Carillo. Ang duha ka partido pulos adunay kaugalingong kompletong lineup nga gilangkoban sa mga beterano ug mga bagito.

Gawas kanila, aduna pay mga independenteng nikandidato sa maong mga posisyon. (Romeo Limpangog ug Sheriza Mae Uy/EIM)(BANAT NEWS)