Comelec modawat balik og magparehistro

CEBU, Philippines - Mobalik sa pagdawat og mga magparehistro ug kadtong mobalhin og rehistro ang Comelec human natapos kagahapong adlawa ang filing sa certificates of candidacy sa mga kandidato.

Apan gipahibalo ni Atty. Lionel Marco Castillano, ang Provincial Comelec Supervisor nga adto sa mga malls ug mga sports complex nila ipadayon ang pagpangrehistro gikan sa alas 9 sa buntag  hangtud sa alas 9 sa gabii.

Hinuon giklaro niya nga abli gihapon ilang mga buhatan nianang mga orasa apan di sila modawat og pagparehistro kay himuon nila kini sa mga offsite registration areas sa mga lungsod.

Gawas sa registration, ang bugtong transaksyon nga buhaton sa ilang mga buhatan mao ang paghatag sa Comelec ID ug certification.

Ang qualified magpa rehistro kadto lang mag 18 anyos ang edad sa adlaw sa piniliay (May 9, 2016), diin atol sa rehistro magdala lang sa ilang birth ceritificate aron pag establisar sa ilang edad.

Gidugang ni Castillano nga gituyo ang offsite registration aron mag-aghat sa mga botante nga moparehistro aron makabotar  atol sa piniliay.

Walay extension sa registration nga tapuson sa Oktubre 31 gumikan kay nahan-ay na tanan ang schedule sa Comelec base sa Comelec en Banc Resolution No. 9981.

Kutob lang sila sa Oktubre 31 ug wala na kini extension pa, ug kalikayan ang pagtumaw na usab sa kahuot sa registration center tungod kay  adto na sagad molihok sa katapusan sa minuto.

Sa wala makahibaw sa ilang status giawhag ni Castillano nga mo-log on lang sa ilang website nga www.comelec.gov.ph ug dayon i- click lang ang precinct finder para makita dayon ang data niini.

Dinhi sa Cebu City, ang pagparehistro sa mga botante sugod karong adlawa himuon diha sa buhatan sa Comelec samtang ini’g ka Domingo himuon kini sa Robinsons Cybergate sugod sa alas-8 sa buntag hangtud sa alas-8 sa gabii.

Matud ni Cebu City Commission on Election (COMELEC)  Officer IV Atty. Marchel Sarno abli sila bisan og holidays ug Domingo aron masiguro nga daghan ang makaparehistro.

Sugod Oktobre 26-29 himuon kini diha sa Ayala Mall samtang sa Oktobre 30-31 mobalik sa Cybergate, Lunes-hangtud Sabado ang pagparehistro didto sa buhatan sa COMELEC. (Renan Alangilan ug Sheriza Mae R. Uy/EIM)(BANAT NEWS)