Polis nagpabuto og armas gipapriso
CEBU, Philippines - Usa ka polis nga giingong nanghasi tungod sa kahubog, nagpabuto ug mition sa iyang armas ngadto sa iyang ugangan ug bayaw ang gipapriso diha sa Casuntingan Police Station sa Mandaue City. Ang insidente nahitabo niadtong miaging gabii diha sa barangay Banilad sa maong dakbayan.
Ang gipapriso mao si Police Officer 3 Christian Peñafiel nga nadestino sa Cebu Provincial Police Office tungod sa reklamo sa iyang ugangan nga si Vicente Seno Sr., 69, ug Vicente Seno Jr., 38.
Matud ni Police Senior Inspector Hugo Rio Ipong, ang hepe sa Casuntingan Police Station, gikatahong nagpabuto og armas ang polis diha sa ilang kural dihang nagkalalis ang ilang mga pamilya.
Gawas pa niini, gipasanginlan si Peñafiel nga miwarawara sa iyang pusil ug gitionan niini iyang ugangan ug bayaw ug gihulga sila niini.
Gidisarmahan sa iyang .9mm service firearm si Peñafiel ug gidala sa tambalanan alang sa liquor test ug didto nasuta nga positibo kining nakainom.
Si Senior Superintendent Rey Lyndon Lawas, hepe sa Regional Directorial Staff sa Police Regional Office-7 miingon nga dili kini ang unang higayon nga nagpabuto sa iyang pusil ang maong polis ug gipasanginlan usab kining manapat sa iyang asawa.
Si Peñafiel mag-atubang og kasong administratiba diha sa Regional Internal Affairs Services-7 ug kasohan usab kini og upat ka criminal case para sa grave threat, illegal discharge of firearm, violation of City Ordinance 1929 kon drunkenness ug illegal possession of firearm.
Si Peñafiel nga nahinabi sa tigbalita nagkanayon nga atubangon niya ang tanang kaso nga ipasaka sa iyaha. (BANAT NEWS)
- Latest
