Anak ni Mayor Chiong mopuli kaniya

CEBU, Philippines - Niduso na sa ila’ng certificate of candidacy si Atty. Kristine Vanessa Chiong sa pagkamayor sa dakbayan sa Naga puli sa iya’ng amahan nga si Mayor Valdemar Chiong kinsa anaa na sa katapusang termino.

Ang runningmate sa abogada mao si Konsehal Othelo "Boy" Chiong.

Ang ila’ng mga konsehal mao sila si Carmelino Cruz Jr., Aurelio Alinsonorin, Delfin Señor, Rodrigo Navarro, Alexander Lara, Luzminda Lapitan, Afshin Mark Señor, Pablo Abangan, Porferio Resaba Jr. ug Virgilio Chiong.

Ubos sila sa Nacionalista Party-Alayon diin sila giubanan ni Kongresista Gerald Anthony "Samsam" Gullas Jr. ug duha nila ka kandidato sa pagka-bokal nga sila si Yolanda Daan, asawa ni Bokal Julian “Teban” Daan nga kandidato sa pagka-konsehal sa dakbayan sa Talisay ug kanhi bokal Raul Bacaltos.

Si Chiong nagkanayon nga ang nakapaaghat niya pagdagan mao ang iya’ng pagka-Nagahanon ug gusto siya nga tiwason ang nindot nga agi sa iya’ng amahan sulod sa siyam ka tuig.

"Ang ako gyung goal ug ako’ng i-assure sa taga Naga nga dili gyud ko magpakauwaw ngadto kanila ug paningkamutan nga ma-implementar ang sakto’ng development sa siyudad," matud ni Chiong.

Siya nidugang nga daghang estorya nga nanggawas nga wala pa siya’y kabangkaagan sa politika apan iya kini’ng gitubag pinaagi sa pagsaysay sa iya’ng profession ug siya nagserbisyo sa opisina sa mayor sulod sa tulo ka tuig sa pagtabang sa pag-implementar sa mga proyekto sa siyudad.

Hinuon iya’ng gipasabot nga ang pagdagan niya ang daghan pa og hagit ug kini iya na’ng gipangandaman ug andam siya nga makat-on sa tanang matang sa pagserbisyo sa katawhan.

"Ang importante man gud sa tawo nga modagan mao ang iya’ng tinuod nga kasing-kasing nga mangalagad sa katawhan," dugang ni Chiong. Si Konsehal Vince del Mar ang buot nga moatbang kaniya sa pagka-mayor apan wala pa kini nakaduso sa iya’ng COC sa pagsuwat sa balita.

"May the best woman win. Focus lang ta sa programs and projects so to have descent campaigning," asoy ni Chiong. (BANAT NEWS)