Manananom og goso mag-bokal
CEBU, Philippines - Ang 69-anyos nga retirado’ng manager sa Shemberg Marketing Corp. ang magpapili sa pagka-bokal sa ika-upat nga distrito.
Si Oscar “Oca” Monzales nga taga Tapilon, lungsod sa Daanbantayan nipadayag nga wala siya’y kwarta apan kasing-kasing ug ang Ginoo lang ang iya’ng gamiton tungod kay iya’ng tumong ang pagtabang sa mga residente sa distrito.
Si Monzales kanhi general manager sa Genu Products Philippines, Inc. dayun production manager sa Shemberg Marketing Corp. sulod sa 28 ka tuig ug secretary-general sa Seaweed Industry Association of the Philippines. Matud ni Monzales nga buot niya tabangan kabahin sa seaweed farming ang mga mananagat alang sa ila’ng panginabuhian.
Gipasabot ni Monzales nga ang ikaupat nga distrito usa ka “fishing area” ug daghan ang mananagat kaysa mag-uuma ug buot niya’ng ipaambit ang iya’ng kahibaw kabahin sa seaweed farming.
Matud ni Monzales nga sa nilabay’ng 46 ka tuig nakatabang na siya sa tanang probinsiya sa Pilipinas kabahin sa livelihood sa seaweed farming ug karon panahon na usab nga iya kini’ng ipaambit sa ila’ng distrito.
“Ako wala’y kwarta, kasing-kasing lang ang ako’ng gigamit ug Ginoo ra kay ang ako’ng intensiyon dili man para pamolitika para man pagtabang sa mga kabus mahitungod sa akong expertise,” matud ni Monzales.
Dugang ni Monzales nga naagni siya sa pag-apil sa politika tungod kay naluoy siya sa mga residente sa ila’ng distrito. (BANAT NEWS)
- Latest
