Villarante nagpasakop sa NPC

CEBU, Philippines - Gipahibawo ni Bise Mayor Romeo Villarante sa syudad sa Talisay kinsa nagtinguha nga modagan pagkamayor nga mosuporta sila sa Nationalist Peoples Coalition (NPC) ni Senador Grace Poe.

Matud niya, si Poe ug Senador Chiz Escudero kinsa modagan pagka-presidente ug pagkabise-presidente sa nasud maoy ilang suportahan.

Samtang suportahan nila si Winston Garcia pagka-gobernador inay nga si Gov. Hilario Davide III nga maoy una niyang gipamahayag.

Kagahapon untang adlawa moduso sa ilang certificates of candidacy ang grupo ni Villarante uban sa iyang running mate nga si Konsehal Danny Caballero apan si Mayor Abe Canoy sa lungsod sa San Fernando nga nagtinguha nga magkongresista ang mihangyo kaniya nga sa adlaw nga Biyernes na lang sila moduso sa COC aron makuha nila ang Certificate of Nomination and Acceptance (CONA) gikan sa NPC.

Matud pa ni Villarante nga nagkaestorya na sila ni Kong. Ace Durano ug sila na gyud ang official nga kandidato sa NPC sa unang distrito bisan wa pa ang ilang CONA. Giangkon ni Villarante nga nahiubos siya kang Davide nga si Mayor Johnny de los Reyes ang gisuportahan niini.

"Loyal baya mi sa LP bisag ang LP dili loyal namo.

Pero sige lang ingon ana lang jud siguro ang panahon," dugang pa ni Caballero. Gihulagway ni Villarante nga nalawgaw sa LP ang unang distrito dihang ilang gipili si Kong. Gerald Anthony "Samsam" Gullas  ug gihatagan og CONA sa partido.

"So kay duol man si Cong. Samsam siya gyud ang makaangkon sa suporta sa LP mao na nga mangandam lang gyud si JVR ani,” matud pa ni Villarante.

Sa nasayran, si Canoy kinsa modagan unta pagka-kongresista atbang ni Gullas wa makakuha og suporta gikan sa LP maong nibalhin siya sa NPC.

Si Gullas miingon nga personal nga desisyon ni Canoy nga mopasilong sa landong sa NPC pero iyang giklaro nga siya ubos gihapon sa Nacionalista Party-Alayon nga nisuporta kang Mar Roxas ug Davide. 

Sa laing bahin, si Ramon Alcoseba nga anak ni Bokal Raul Alcoseba nga kaalyado sa Liberal Party (LP) miduso usab sa iyang COC kagahapon diin mikandidato kini isip provincial board sa unang distrito.

 Si Ramon kinsa chief of staff karon sa buhatan sa iyang amahan diha sa Kapitolyo buot nga maoy mopadayon sa mga nasugdan sa iyang amahan sa distrito.

 Gusto niyang tabangan ang mga senior citizen, pagsuporta sa mga sports development ug pagtabang sa mga residente sa distrito. (BANAT NEWS)