Angtud wa dawata ni Davide
CEBU, Philippines - Wala dawata ni Gobernador Hilario Davide III ang bag-ong Provincial Schools Division Superintendent sa Department of Education nga si Dr. Rhea Mar Angtud.
Kini atol sa courtesy call ni Angtud gumikan kay dili pa siya buot nga hulipan si Dr. Arden Monisit kinsa gibalhin na sa Mandaue City Schools Division.
Matud ni Davide nga wala siya’y nakita’ng problema ni Monisit ug wala’y rason nga pulihan.
Ang kamanduan gikan kang DepEd Secretary Armin Luistro.
Si Davide nangayo og pasaylo kang Angtud tungod kay dili siya gusto’ng pulihan si Monisit.
“As far as I know, as far as I’m concerned wala pa man tingale mo-overstay si Dr. Monisit, para nako ngano’ng ilisan man siya nga para nako maayo man og performance si Monisit?” matud ni Davide.
Si Davide mopadangat og suwat sa DepEd nga ibalik si Monisit sa probinsiya.
Si Monisit nagpasalamat kang Davide sa gihatag nga pagsalig ug kompiyansa ngadto kaniya.
Dugang niya nga igo lang siya mosunod sa kamanduan kung ugaling ipabalik siya sa probinsiya.
Si Monisit atoa karon sa Manila alang sa usa ka semana nga training. (Brenda D. Batuto/GMR)
8,000 na nakarehistro sa IEC
Dul-an na sa 8,000 ka delegado ang nagparehistro alang sa 51st International Eucharistic Congress nga ipahigayon sa dakbayan sa Sugbo karong Enero 24 hangtud 31.
Kini ang gibutyag ni Auxiliary Bishop Dennis Villarojo, ang secretary-general sa 51st IEC nga nahinabi sa Banat News.
Matud ni Villarojo nga on track karon ang IEC diin 6,005 na ka delegado ang hingpit na’ng nakabayad ug adunay uban nga nakarehistro ang wala pa makakompleto sa ila’ng bayronon.
Lakip sa naa sa talaan sa nakarehistro ang usa ka libo ka langyaw.
Sumala pa ni Villarojo nga hapit na sila moabot sa katunga sa ila’ng target nga 15,000 ka delegado nga makatambong sa kalihukan sulod sa Pavilion.
Dugang ni Villarojo nga tanang Sugbuanon o bisan kinsa ang mahimo nga makatambong sa kalihukan sa IEC sama sa misa, prosesyon ug visita iglesia gawas lang sa conference kay kinahanglan gyud nga marehistro tungod kay adto kini buhaton sa Pavilion. Ang registration fee nagkantidad og P8,000 sa tibuok Congress ug P4,000 sa moapil sulod lang sa upat ka adlaw diin ang rehistrasyon tak-upan inig Enero 20 sunod tuig, upat ka adlaw sa dili pa ang IEC.
Gibutyag usab ni Villarojo nga on track usab ang pagtrabaho sa Pavilion tungod kay naa na sa 95 porsiyento ang pagtrabaho niini ug lakip sa gitrabaho ang drainage site development plan sa lugar diin i-turnover kini sa Archdiocese of Cebu sa higayon nga moabot si Archbishop Jose Palma gikan sa Roma.
Ugma usa ka Santos nga Misa ang ipahigayon sa Cebu Metropolitan Cathedral alas 5 sa hapon alang sa pagsugod sa 100-day countdown alang sa umaabot nga IEC. (BANAT NEWS)
- Latest
