Alayon sa Talisay nakaduso na sa COC

CEBU, Philippines – Pormal na nga niduso sa ilang certificate of candidacy ang mga kandidato sa Alayon Party nga gipangulohan ni kanhi kongresista Eduardo “Eddigul” Gullas kinsa subling makig-atbang ni Mayor Johnny de los Reyes kagahapon sa buntag.

Kini naatol sa ika-85 ka tuig nga adlaw'ng natawhan ni Gullas.

Si Gullas giubanan sa iya’ng asawa nga si Norma ug sa iya’ng apo nga si Kong. Gerald Anthony "Samsam" Gullas sa una’ng distrito.

Matud ni Eddigul nga unta ang mga botante sa siyudad sa Talisay ang mokompara sa iya’ng nahimo diha’ng siya ang mayor itandi kang de los Reyes.

Ang pares ni Gullas nga si kanhi bise mayor Alan Bucao ang niduso usab sa iya’ng COC dayun ang mga kandidato sa pagka-konsehal nga sila si Konsehal Richard Francis "Choy" Aznar, Antonio "Jojo" Bacaltos Jr., Socrates "Soc" Fernandez ug Doroteo "Dory" Emit, kanhi konsehal Rodi Cabigas ug Arturo "Turo" Bas samtang napuno sa grupo sila si Bokal Julian "Teban" Daan, Tabunok Barangay Kapitan Manuel Cabriana, Gail Restauro, anak ni kanhi bokal Sergio Restauro, ug konsehal sa Barangay Cansojong nga si Ferdinand Rabaya.

Si Teban kinsa mapupos na ang termino hulipan sa iya’ng asawa nga si Yolanda "Yolly" Daan pares ni kanhi bokal Raul Bacaltos.

Sa dakbayan sa Sugbo, si Kamputhaw Kapitan Lorenzo Basamot nakaduso sa iya’ng COC sa pagka-konsehal sa North District isip independente niadto’ng Lunes sa hapon.

Laing nakaduso niadto’ng Lunes sila si Romeo Capangpangan sa pagka-konsehal sa South District ug si Juan Arenaza sa pagka-kongresista sa North District.

Samtang gihulagway ni Superintendent Romeo Santander, hepe sa City Intelligence Branch sa Cebu City Police Office nga malinawon ang una’ng duha ka adlaw sa pagduso sa COC sa mga kandidato.

Sa kinatibuk-an wala’y nadawat nga taho ang kapolisan nga may kagubot sa pagduso sa COC.

Apan alerto lang gihapon ang kapolisan sa rehiyon sa posible’ng panghitabo. - Rowena D. Capistrano, Sheriza Mae R. Uy ug Bryner L. Diaz/GMR) (BANAT NEWS)