Kalabera iya sa polis?

CEBU, Philippines – Nakaplagan sa amahan ug anak nga nangahoy ang usa ka kalabera sa barangay Santicon, lungsod sa Badian pasado alas 10 sa niagi’ng buntag.

Si Tanny Carticiano ug ang anak nga si Jade nangahoy unta sa sitio Kulabtingon apan may nakaplagan sila’ng kalabera mga 100 metros gikan sa barangay road.

Sumala pa ni Senior Police Officer 2 Jeremias Elardo, desk officer sa Badian Police Station, nga diha’ng ila’ng gisusi ang kalabera, ilang nabantayan nga adunay belt bag.

Ang bag may sulod nga firearms license card, ATM card ug driver’s license nga iya ni PO1 Jimmy Jorge.

Matud ni Senior Superintendent Rey Lyndon Lawas, hepe sa Regional Directorial Staff,  nga kinahanglan pa’ng hilngon ang kalabera aron mailhan kun kinsa kini ug ang sirkumstansiya sa iya’ng kamatayon.

Si Superintendent Renato Dugan, hepe sa Regional Personnel and Human Resources Development Division, niingon nga si Jorge nadawat sa pagkapolis sukad niadto’ng 2007.

Na-assign siya sa Tourist Police Unit ug nahimo siya’ng aide ni Cebu City Mayor Michael Rama ug sunod niya nga assignment mao ang Mobile Patrol Group niadto’ng Pebrero 14, 2014 apan wala na kini nipakita.

Tungod niini gipasakaan siya og kaso’ng administratiba tungod sa pagpalta sa trabaho hangtud nga gitangtang sa pagka-polis niadto’ng Agosto.

Kagahapon sa buntag ang mga sakop sa Scene of the Crime Operative nihiling na sa kalabera nga nakaplagan. - /GMR) (BANAT NEWS)