Bin-Go miduso na sa ilang COCs
CEBU, Philippines – Miduso na sa ilang certificates of candidacies sila si Vice President Jejomar "Jojo" Binay ug Sen. Gregorio "Gringo" Honasan alang sa pagka-presidente ug bise presidente kagahapon.
Sila si Binay ug Honasan sa United Nationalist Alliance maoy maisip nga oposisyon ug maoy nauna sa pagsang-at sa ilang kandidatora sa maong posisyon diha sa Commission on Elections main office sa Intramuros.
Matud pa nga gituyo sa "Bin-Go" tandem nga sila makauna sa pagduso niini kay haom kini sa pangalan sa ilang partido nga UNA nga nagpasabot una, matud pa sa report sa PhilStar.Com.
Si Honasan bag-ohay lang nidawat sa imbitasyon sa UNA nga makapares ni Binay human sa nanglabay nga mga buwan nga walay napili ang partido.
Gani ang pagkuha kang Honasan nakapakurat pa sa kadaghanan tungod kay wala kini sukad moguwa sa mga balita nga interesado kining modagan sa mas taas nga posisyon sa senado.
Gipaabot nga makaatbang ni Honasan sila si Sen. Alan Peter Cayetano, Francis "Chiz" Escudero, Ferdinand "Bongbong" Marcos Jr. , Antonio "Sonny" Trillanes IV ug Camarines Sur Rep. Maria Leonor "Leni" Robredo.
Gawas nilang Cayetano ug Marcos, ang tulo ka mokandidato sa pagka-bise presidente mga kapareho ni Honasan nga mga Bicolano. (Gikan sa Wires/EIM)
- Latest
