Mga tulisan sa Talisay, Cebu City nangasikop

CEBU, Philippines – Niabot na gyud ang adlaw sa duha ka tulisan nga responsable sa sunod-sunod nga tulis sa dakbayan sa Talisay ug kasikbit nga mga lugar.

Ang notado’ng mga tulisan nailhan nga sila si Johnrey Mendez, 20, nga taga Kinasang-an Pardo, Cebu City ug Carlo Besin, 21, nga taga Candulawan, dakbayan sa Talisay.

Nasikop ang duha human ang ila’ng motorsiklo’ng kinawat ang naguba human ang kadena naputol ug sila gipangkulata sa mga standby sa Ramona Village, San Isidro niadto’ng Sabado sa alas 2:30 sa hapon.

Alas 12:30 sa udto ang duha ka suspek ang nikarnap sa motorsiklo nga XRM nga gipanag-iya sa usa ka Jomar sa Candulawan.

Duha ka oras ang nilabay, gitulis sa duha si Ramil Tiempo, 23, sa Punta Princesa-Labangon, Cebu City ug nakuha sa duha ang kwarta sa biktima ug cellphone nga O+.

Mga alas 2:30 sa hapon naabot ang duha sa Ramona Village, Uldog ug gitulis si Khent Edrianne Gabuya, 20, ulitawo nga taga Mansueto Village, Bulacao.

Matud ni SPO3 Rolando Andales nga nagsakay og trisikad si Gabuya samtang padulong sa panimaye sa iya’ng kaliwat.

Niabot ang mga suspek sakay sa motorsiklo ug gibabagan ang trisikad dayun tion sa armas nga .22 magnum revolver. Nideklarar kini og tulis ug nisakiyo sa bag sa biktima nga adunay sulod nga cellphone nga mobalor sa P15,000.

Nisibat ang mga suspek sakay gihapon sa motorsiklo apan wala’y swerte kay naputol ang kadena hinungdan nga kini napundo.

Nanganaug ang duha ka suspek ug dali nila’ng giayo ang kadena apan ulahi na ang tanan human sila nasundan sa biktima ug mga standby sa lugar dayun sila gipangkulata. Naabot ang kapolisan ug gidala sila sa Talisay City Police Station.

Human nahibawo ang taga Pardo Police Station, dali sila’ng nakig-coordinate sa Talisay City Police kay ang mga suspek mao sab ang ila’ng dugay na nga gipangita.

Alas 3:30 sa hapon, nipatim-aw si Kate Alcantara nga taga barangay Dumlog ug niila sa mga suspek nga mao’y nitulis kaniya niadto’ng Oktubre 2 sa tunga’ng gabie samtang padulong na siya nga mopauli sa ila’ng panimaye.

Nakuha gikan kaniya ang cellphone ug kwarta nga mokantidad og P4,000.

Si Supt. Germano Mallari, hepe sa kapolisan sa dakbayan sa Talisay, nalipay sa pagkasikop sa duha tungod kay mao kini ang dugay na nila’ng gipangita aron itaral sa korte.

Asoy pa niya nga bag-ong sulbong nga mga tulisan ang nangadakpan. Iya’ng gihulagway nga mokunhod na ang pagpanulis sa siyudad gumikan sa pagkadakop sa duha apan wala gihapon sila mokompiyansa kay nagtuo pa sila nga aduna pa’y daghan nga mga tulisan nga bag-ong sulbong nga naa pa sa gawas nagsaoy-saoy.

Gikatakda’ng pasakaan og kaso ang duha ka dinakpan karong adlawa. - /GMR) (BANAT NEWS)