Walhong pundok gibantayan sa APEC
CEBU, Philippines - Gibutyag sa pangulo sa kapolisan sa nasud, Police Director General Ricardo Marquez, nga lahi karon ang ila’ng preparasyon alang sa Asia-Pacific Economic Cooperation (APEC) Meetings sa Sugbo.
Gibantayan ang mga walhong pundok kinsa nibahad nga mopahigayun og mga lihok protesta sa lugar diin ipahigayon ang meeting.
Hinuon gitataw ni Marquez nga girespetar nila ang katungod ni bisan kinsa apan angay hinumduman nga adunay mga bisita nga gikan sa lain-laing lugar ug angay ipakita ang ka maabiabihon.
Sa ila’ng situation briefing, wala’y nadawat nga impormasyon nga adunay hulga o grupo nga motisok og kagubot subay na sa kalihukan.
Lakip sa gipaneguro nga ang nahitabo sa mga turista sa Samal Island sa Davao del Norte nga gidagit dili mahitabo sa Sugbo.
Niadto’ng una’ng hugna sa APEC Meeting adunay reklamo ang kapolisan labot sa pagkaon mao’ng gihisgutan kini ni Marquez ngadto ni Police Regional Office -7 Director Prudencio Tom Bañas kinsa iya’ng gipahinumduman nga sundon ang gihimo sa kapolisan sa Iloilo labot sa ila’ng meal allowance aron wala na’y reklamo nga madawat. (BANAT NEWS)
- Latest
