Bata napusilan sa bata

CEBU, Philippines - Patay ang usa ka 16-anyos nga lalaki human kini giingon nga aksidente nga napusilan sa iyang 15-anyos nga amigo nga nagduwa og armas sulod sa ilang panimalay sa sitio Kamagong, barangay Lahug sa dakbayan sa Sugbo.

Ang namatay mao si Chelo Valenzona, 16 anyos ug nagpuyo sa maong lugar, human kini naigo sa iyang tangkugo. Si Valenzona giingon nga aksidenteng napusilan sa iyang 15-anyos nga amigo sulod sa kwarto niini.

Matud sa inahan ni Valenzona nga si Isabelle Sonit, ang biktima padung na unta nga mosulod sa iyang night class sa Grade 8 sa Lahug National High School apan nananghid nga aduna kini i-research makadiyot sa kompyuteran. Matud ni Sonit nakit-an pa  niya nga nag-computer ang anak apan pagbalik niya, wala na kini didto. “Gidala na anang nakapusil didto sa ila,” matud ni Sonit.

Paglabay sa pipila ka minutos nakadungog sila og buto gikan sa ilang silingan ug iyang nadungog ang tingog sa iyang anak nga nagpakiluoy sa iyaha nga tabangan tungod kay napusilan na kini sa tangkugo.

Dali nilang gidala sa Perpetual Soccour Hospital ang anak ug miuban pa ang 15-anyos nga bata ug ang inahan niini.

Matud ni Sonit nga gisayangan gyud siya sa iyang anak kay maayo gyud kini nga bata ug maapil pa kini sa mga top students sa ilang eskwelahan.  Giangkon niyang suod nga managhigala ang duha sukad pa sa ilang pagkabata apan wala siya kahibawo kung nagbikil ang duha.

Nagduda siya kung aksidente lang ang nahitabo tungod kay dili lang  kini ang unang higayon nga giingong nanion og armas ang 15-anyos kaparehas niya og edad sa ilang lugar.

Midugang usab kini nga ang embalsamador mitug-an kanila nga duha ka bala ang nakita sa ulo sa iyang anak mao nga buot niyang ipa-autopsy ang anak.

Apan matud ni Police Officer 3 Edario Manatad, imbestigador sa Homicide Section sa Cebu City Police Office, sa dagan karon sa ilang imbestigasyon posibleng aksidente gyud ang nahitabo.

“Kay og naa pud intensyon nga pusilon, sibat gyud siya (suspek). Dili sad na niya buhaton didto sa iyang kwarto. So possible nga aksidente gyud,” sigon ni Manatad.

Wa na nila ma-recover ang armas kay matud pa sa suspek iya dayon kining giitsa sa kutson aron tabangan iyang amigo. Wa usab motug-an ang bata kun asa gikan ang armas.

Matud pa ni Manatad ang bata mitug-an nga rebolber ang armas apan gitangtangan niya kini og usa ka bala una pa gikablit apan nakurat kini kay nibuto.

 “Unya igkablit nimo, motuyok man gyud na (tambor), adto gyud motumong sa naay bala,” matud pa ni Manatad kabahin sa kawalay kasayoran sa batan-on sa mekanismo sa rebolber.

Kagahapon sa hapon napasaka na ang kasong homicide batok sa 15-anyos ug gipahibalo na ang Department of Social Welfare and Development bahin sa maong hitabo. (BANAT NEWS)