Langyaw nangulata’g babaye gidakop
CEBU, Philippines - Gibalhug sa selda sa Compostela Police Station ang Amerikano nga gireklamo og pagpangulata sa usa ka babaye tungod sa bingkil sa trapiko sa barangay Poblacion alas 3 pasado ang takna sa hapon niadto’ng Martes.
Si Senior Police Officer 2 Larry Fernandez sa Compostela Police Station niila sa gidakop nga si Randy Fairon Falkner, 57, temporaryo nga nagpuyo sa dalan Mabini, dakbayan sa Danao.
Ang biktima giila nga si Gwendolyn Alcantara Bacalla, 47, taga Poblacion, Compostela ug nakabaton og samad sa kamot, ulo ug nawong.
Matud ni Fernandez nga ang biktima ug ang langyaw pulos nagmaneho sa ila’ng sakyanan apan hapit kini magkasungag hinungdan sa mainiton nga panaglalis.
Ang langyaw wala nakapugong sa iya’ng kapungot ug nibakyaw sa mga kamot ngadto sa biktima pinaagi sa pagdapog.
Ang motorista nga giila’ng si Ronnie Po Tan, 57, nga taga barangay Magay, Compostela nga nakakita dali nga nipakgang pinaagi sa pagdakop sa langyaw ug gitahan kini ngadto sa kapolisan. (BANAT NEWS)
- Latest
