Usa gianod sa Butuanon River, Mananga River miawas usab

CEBU, Philippines - Usa ka lalaki nga gikatahong nag-sideline pagpatabok sa mga tawong natanggong sa baha sakay sa iyang gihimong sakayan ang gikatahong naanod diha sa Butuanon River sa dakbayan sa Mandaue kagahapon sa hapon. Ang maong lalaki nga naila lang sa pangalan nga Tinoy Tulod taga, Maguikay, gikatahong nasigpatan sa mga lumolupyo sa sitio Salvacion, Maguikay naanod sa kusog kaayong bul-og sa tubig.

Ang operator sa Bantay Mandaue sa Command Center nga si Gerome Ursal  miingon nga si Judith Villanueva, sakop sa Solid Waste Management Program maoy nakasigpat kang Tulod nga nagsakay og bangka ug kalit lang mitikyaob hinungdan sa pagkaanod niini.

Ang lumolupyo sa maong dapit nga si Albert Ceniza dali usab nipahibalo ngadto sa Command Center hinungdan sa gilusad nga search and rescue operation.

Ang mga sakop sa City Disaster Risk Reduction and Management Council nga gipangulohan ni Felix Suico misubay gikan sa  Maguikay paingon sa Paknaan ug Umapad sa maong dakbayan apan wa na nila makit-i si Tulod. Matud pa ni Suico, ang mga sakop sa Philippine Coast Guard gialerto na usab bahin sa nahitabo.

Dugang pa ni Suico tungod kay nagkilom-kilom na ang adlaw gihunong una nila ang pagpangita ug mobalik sila pagpangita niini karong buntag.

Sa laing bahin, dul-an upat ka oras natanggong ang gatosan ka mga residente sa Campo 2,  barangay Jaclupan sa dakbayan sa Talisay human niawas ang tubig sa Mananga River gumikan sa kakusog sa uwan sa bukid ug nimugna og kusog nga bul-og sa tubig nga midagayday sa sapa.

Alas 12 sa udto kagahapon dihang miawas ang sapa hinungdan nga daghan ang wala nakaagi ang gikan sa barangay Manipis paingon sa Tabunok ug ang gikan sa Tabunok pabalik.

Nasayran, ang main road sa maong lugar gipaubos sa road widening sa Department of Public Works and Highways nga ang kontraktor mao ang QM Builders. Mao nga ang ubos nga bahin sa sapa maoy gihimong diversion road pinaagi sa gihimong spillway samtang gitrabaho pa ang karsada. Apan ang spillway nga gigamitan og gagmay nga culverts gilapawan lang kini sa tubig.

Si Konsehal Danny Caballero, Peace and Order Committee dali nga miadto sa lugar aron pagsusi sa sitwasyon ug kahimtang sa mga tawo.

"Unta ang taga QM Builders ang makakita aning problemaha kay siguro man ko nga mobalik ra gyud gihapon ni ang panghitabo," matud pa ni Caballero.

Si Gina Labajo, 40 anyos ang nipahibawo nga balay sa ilang silingan ang nasudlan sa tubig.

Si Willie Abatayo, project supervisor sa QM Builders nagkanayon nga iyang ipaabot ang sugyot ni Caballero sa iyang labaw. (BANAT NEWS)