Carillo gireklamo sa kusinero

CEBU, Philippines – Gipasakaan og kasong grave abuse of authority ug grave/serious misconduct si Konsehal Gerardo Carillo ngadto sa Office of the President ni Michael Abellana kinsa kanhi nagtrabaho isip utility worker sa iyang buhatan.

Base sa affidavit ni Abellana, mopasaka siya og kaso batok ni Carillo tungod sa paggamit sa konsehal kaniya isip tigluto sa usa ka pribado nga restaurant nga gipanag-iya sa uyab ni Carillo nga si Ara Flores.

Matud niya tigdawatan gihapon siya og sweldo sa gobiyerno ug oras sa tingtrabaho sa city hall siya magluto.

Ang pasangil ni Abellana gidasonan usab sa kitchen helper nga si Maria Victoria Abellana nga makit-an niya si Abellana sa restaurant sayo sa buntag sa Miyerkules hangtud sa alas 11 sa buntag isip tigluto sa restaurant.

Laing testigo nga miduso og affidavit  mao si Rune Maquiling, Administrative Assistant sa buhatan ni Carillo nga nag-ingong si Abellana moadto lamang sa City Hall aron mo punch in ug punch out sa biometrics ug modiretso na ngadto sa restaurant aron motrabaho isip tigluto. Dugang pa ni Maquiling nga motabang lamang si Abellana o motrabaho isip utility worker kun siya bakante sa iyang trabaho.

Gawas kang Abellana tug-an usab sa affidavit ni Maquiling nga bisan siya gihimo usab nga personal driver ni Carillo ug sa iyang uyab matag Sabado ug Domingo nga walay gihatag nga bayad.

Si kanhi kong. Tomas  Osmeña nagkanayon nga mahimong pasakaan og kasong kriminal si Carillo ug andam siyang mohatag og legal aid sa mga reklamante ni Carillo.

Si Carillo sa iyang bahin nihagit kang Osmeña nga adto isang-at ang reklamo batok kaniya sa usa ka independenteng buhatan ug di sa Office of the President tungod kay nagtuo siyang dili siya hatagan og patas nga paghusay.

Matud pa ni Carillo, dili na bag-o ang maong kaso nga ipasaka kaniya ug klaro kaayo nga dunay pamolitika tungod kay dugay na ang maong isyu ug karon ra gipasaka kay “leading” siya sa survey.

Sumala pa ni Carillo, andam usab siya mopasaka og kaso sa higayon nga madawat na niya ang reklamo batok kaniya ug kung ugaling mahuman usab siya pagtuon sa maong kaso.

Gibutyag ni Carillo, nga kanhi mga trabahante ni Kong. Rodrigo Abellanosa ang mga empleyado nga nipasaka og kaso batok kaniya hinungdan naluoy siya niini kay nagamit sila sa mga politiko. Si Carillo nipadayag nga aduna pa siyay respeto sa kanhi kongresista nga si Osmeña pero iya kining gihagit nga dili magpataka og pasaka og kaso ug mas maayo nga buhaton niini ang moadto sa proper forum ug dili sa buhatan sa presidente tungod kay sakop man kini sa Liberal Party.

"I challenge him, to file in the independent body in court or ombudsman, kay akong tun-an ang maong kaso kay basin nakalimot siya  nga abogado usab ako," pasabot pang Carillo. – /EIM) (BANAT NEWS)