Puya gibilin namatay

CEBU, Philippines – Usa ka bag-ong nahimugso nga batang lalaki ang nakit-ang gibilin gawas sa usa ka balay nga giputos og papel diha sa Purok Okra, barangay Hagnaya sa lungsod sa San Remegio niadtong nakalabay nga gabii.

Matud pa ni Police Officer 3 Dante Teaño, desk officer sa San Remigio Police nga nahinabi sa Banat News nga usa ka Malyn Hinoguin, 24, maoy nakakita sa maong puya samtang gikan kini nanugway sa iyang kanding.

Sumala pa ni Teaño nga giputos sa papel ang puya ug gibilin duol sa gate sa balay. Gumikan kay dautan man ang panahon niadtong orasa dali  niining gidala ang puya sa ilang balay ug pagkabuntag na kini mitaho sa kapulisan. Ang kapulisan sa maong lungsod mitawag sa taga Department of Social Welfare and Development (DSWD) ug gikuha ang masuso ug gidala kini sa tambalanan tungod kay nabantayan nga luya kini.

Apan niadtong nakalabay nga kaadlawon nakabsan sa kinabuhi ang masuso sulod sa Cebu Provincial Hospital sa dakbayan sa Bogo.

Si Teaño miingon nga nakig-alayon na sila sa kapitan sa barangay sa maong dapit aron mahibaw-an kung kinsa ang posibleng inahan sa maong masuso.

Nagduda si Teaño nga residente sa maong barangay ang inahan niini kay papel ra man gani ang giputos sa lawas sa bata.  – /EIM) (BANAT NEWS)