Paghimo sa draft MOA sa 93-1 wa’y tagal

CEBU, Philippines - Wala’y tagal nga gihatag ngadto sa technical working group sa paghan-ay sa memorandum of agreement tali sa Kapitolyo ug kagamhanan sa dakbayan sa Sugbo labot sa isyu sa 93-1.

Ang mga opisyal sa Kapitolyo naghuwat sa draft sa MOA aron kini mabasa sumala pa ni Provincial Legal Officer Orvi Ortega. Matud ni Ortega nga kung mahuman na ang draft sa MOA, ipresentar kini ngadto sa mga opisyal sa Kapitolyo.

Gipasabot ni Ortega nga kinahanglan nga ang MOA nagsubay usab sa balaud ang mga terms and condition ug dili mosumpaki sa existing rules and regulations.

Sayo niini si Bise Gobernador Agnes Magpale nibutyag nga aduna na’y nasabutan ang probinsiya ug dakbayan sa Sugbo kabahin sa 93-1.

Sugyot sa probinsiya nga mas taas og diyutay sa gitanyag nga P500 milyones ang ibayad sa dakbayan sa Sugbo bugti sa mga luna nga nasakop sa 93-1.

Dugang gipangayo ang luna nga adunay market value nga P1.3 bilyones sanglit ang mga luna sa 93-1 mokabat na sa P1.8 bilyones ang market value. – /GMR) (BANAT NEWS)