Mga bata gibangkahan ni Radaza

CEBU, Philippines – Giuban sa pagsuroy sa usa ka museum ug dinner party sa usa ka resort ni Lapu-Lapu City Mayor Paz Radaza ang kapin sa 40 ka bata gikan sa Home Care Center atol sa pag-abli sa Children's Month Celebration niining buwan sa Oktubre.

Ang maong kalihukan adunay koordinasiyon sa mga opisyal sa LLC Home Care Center nga nahimutang sa barangy Gun-ob ning siyudad.

Matud ni Letecia Patalinjug, tagdumala sa maong center nga ang kalihukan nga gipahigayon sa miaging Sabado usa ka field exposure sa mga bata.

Ang center ang nagsilbing puy-anan sa mga batang biktima sa abuso ug mga batang adunay problema sa balaod.

Sa pakighinabi ni Radaza sa Banat News, siya mitug-an nga hagbay na nila kining giplano apan na-postpone sa makadaghang higayon.

Gidala ni Radaza ang mga bata sa Happy World Museum sa lungsod sa Cordova ug nangaon sa usa ka fast food restaurant, human niini, miadto sa Crimson Resort and Spa Mactan alang sa paghatag og dinner party. – /EIM) (BANAT NEWS)