Mabdos sikop sa shabu

CEBU, Philippines - Nadakpan sa mga sakop sa Criminal Investigation and Detection Group-7 ang usa ka babaye nga pito ka buwan nga mabdos gumikan sa pagpamaligya og ilegal nga drugas sa Mambaling, dakbayan sa Sugbo niadto’ng nakalabay nga hapon.

Ang nadakpan naila nga si Nicole Ann Maloloy-on, 18, kinsa nihangyo pa sa kapolisan nga dili na lang pasakaan og kaso.

Nasikop si Maloloy-on human nakuhaan og gituohang shabu sa kapolisan atol sa pagpangronda.

Niangkon hinuon ang dinakpan nga usa ka runner sa ilegal nga negosyo ug ang supply gikan sa iya’ng amahan nga si Bador kinsa naka-eskapo atol sa operasyon.

Ang operasyon gipangulohan ni Supt. Fermin Armendarez III pinasikad sa search warrant nga gi-isyu ni Judge Soliver Peras batok ni Bador nga nagpuyo sa sitio Tugas.

Matud sa kapolisan nga aduna’y mga estudyante nga kostumer ni Bador nga nagtungha duol sa iya’ng gipuy-an.

Apil sa nadakpan ang kapuyo ni Maloloy-on nga si Jumberth Suson ug ang ila’ng silingan nga si Jeorico Mantillo.

Sa pagpakighinabi sa mga tigbalita ni Nicole kini niingon nga igo lang nagbilin og pinakete’ng shabu ang iya’ng amahan ug igo lang kini magdumduman sa iya’ng gipuy-an aron subayon kung pila na ang halin.

Kini usab nitug-an nga napugos siya pagpamaligya og shabu aron maka-pundo og salapi alang sa iya’ng pagpanganak.

“Maayo na lang unta makakwarta mi og gamay para manganak nako,” matud ni Maloloy-on nga igo na lang nipatulo sa iya’ng luha.

Sulod sa gipuy-an nga lawak ni Nicole aduna’y close circuit television (CCTV) camera nga makit-an ang magpaingon sa iya’ng gipuy-an apan wala na kini nakalihok diha’ng nahamagan sa CIDG-7.

Mokabat sa 26 ka gagmay nga pakete ug usa ka medium-size sa gituohang shabu ang nasakmit sa kapolisan nga mokantidad og halos P100,000. Nakuha sab sa kapolisan ang .22 revolver sulod sa gipuy-an sa mga dinakpan kinsa gitanggong na sa selda sa CIDG-7.

Samtang nasakmit sa kapolisan ang ilegal nga drugas nga gibana-bana’ng anaa sa P200,000 ang kantidad gikan sa 57-anyos nga lalaki sa sitio Abuno, Pajac, dakbayan sa Lapu-Lapu atol sa buy-bust operation sa niagi’ng Huwebes sa buntag.

Dali’ng gidakop si Moises Hiyas Sr. kinsa apil sa “Top Ten Illegal Drug Personalities for Neutralization” sa Mactan Police Station 2 pasado alas 11 sa buntag.

Ang operasyon gipangulohan ni Senior Inspector Judith Besas sa Lapu-Lapu City Police Office-City Anti-Illegal Drug Special Operations Task Group (CAIDSOTG) diin ang police poseur buyer ang nihimo og transaksyon ni Hiyas.

Sa gipahigayun nga negosasyon ngadto ni Hiyas, nideklarar dayun og aresto ang sakop sa kapolisan ug dali kini’ng gidakop. Nasakmit ang 15 ka gagmay’ng pakete sa shabu ug laing tulo ka medium-size, usa ka .45 caliber pistol nga adunay pito ka bala ug drug paraphernalia.

Narekober usab ang P500 nga marked money gikan sa suspek kinsa gibalhug na sa LCPO holding cell. (Jojo C. Ugdol ug Christell Fatima M. Tudtud/GMR)(BANAT NEWS)