Duha ka polis nabun-og

CEBU, Philippines - Maayong pagka black eye sa deputy chief sa kapulisan sa lungsod sa Samboan human kini gisumbag sa lalaking ilang gi-uwang human nakakita og sukmagay sa diskohan diha sa barangay Poblacion.

Ang nasumbagan nga polis mao si Senior Police Officer 2 Niel Seno, samtang ang iyang kauban nga si Police Officer 1 Arnold Rusiana nakaangkon og samad sa bukton human nanukol sa mga polis ang mga kauban sa ilang gibadlong.

Tulo ka mga tawo ang gipangsikop sa kapulisan sa maong hitabo nga sila si Jestoni Pancho, 25, nga maoy nanumbag sa polis, Leonell Pancho, 26, magulang niini ug ang ilang ig-agaw nga si Remar Rocaberte, 23, pulos taga barangay Jumangpas sa maong lungsod.

Matud pa ni Police Officer 1 Serge Heramis sa Samboan Police nga nahinabi sa Banat News nagsaulog sa ilang pista ang maong dapit ug dunay disko nga gihimo.

Apan adunay nagsinumbagay nga mga batan-on sa lugar hinungdan nga ila kini nga girespondehan apan pagresponde sa mga polis duna pay nisunod nga lamok-lamok ug diha nangaangol sila si Seno ug Rusiana. Tungod niini gipangpaslak sila sa selda ug kasohan og direct assault.  (BANAT NEWS)