Pundohanan sa tubig patabunan
CEBU, Philippines - Giawhag sa Provincial Agriculture Office ang mga mag-uuma sa pagtakub sa mga gipangpundohan nila og tubig aron wala’y makasulod nga lamok nga posible’ng magdala og dengue.
Si Virgilio Jakosalem, chief operation sa PAO, nagkanayon nga ang mga mag-uuma gipapundo nila og tubig samtang aduna pa’y uwan aron kung moabot ang panahon nga wala na’y uwan duna sila’y magamit nga tubig nga ibisbis sa mga tanom.
Ang probinsiya nanghatag og mga water drums ngadto sa kalungsuran nga magamit nga pundohan og tubig.
Apan matud ni Jakosalem nga ang mga mag-uuma gipasidan-an usab nila nga kinahanglan nga takuban nila ang mga gipangpundo nga tubig aron wala’y lamok nga makapuyo niini paglikay sa dengue.
Ang lamok nga nagdala og kagaw sa dengue anha mangitlog sa limpyo’ng tubig.
Niining ulahi lang, ang Provincial Health Office (PHO) nibutyag nga sukad sa buwan sa Enero hangtud Septiyembre niabot sa 228 ang kaso sa dengue sa probinsiya ug tulo ka bata ang namatay.
Ang mao’ng mga bata residente sa lungsod sa Lilo-an, Minglanilla ug Alegria.
Ang top 3 nga mga lugar sa kaso sa dengue gilangkuban sa lungsod sa Argao, 101; Balamban, 74 ug dakbayan sa Carcar, 73. (BANAT NEWS)
- Latest
