Mayor Canoy pabiling LP, 3rd District wa pay lineup

CEBU, Philippines – Gihimakak ni Mayor Antonio "Abe" Canoy sa lungsod sa San Fernando nga nibiya na siya sa Liberal Party ug mitapon sa grupo ni Bise Presidente Jejomar Binay.

Iyang gipasabot nga wa siyay nakitang rason kun nganong mobiya siya sa LP labi na gyud ug wa siya gisalikway sa maong grupo.

Si Canoy naglaraw nga atbangan si Kongresista Gerald Anthony "Sam-Sam" Gullas sa unang distrito sa sunod tuig nga piniliay.

Nagtuo siya nga siya maoy pilion nga kandidato sa LP pagka-kongresista ug dili si Gullas nga bag-o lang misalida sa ilang grupo ug siya maoy orihinal nga LP.

Mitumaw ang balita nga ang batan-ong Gullas ang gusto ni kanhi interior secretary Mar Roxas kinsa mao usab ang pambato sa LP pagka-presidente sa sunod tuig nga eleksyon.

Asoy pa niya nga aduna siyay salig ni Gob. Hilario Davide III, kinsa giila nga provincial chairman sa maong partido nga siya gyud ang pilion niini nga kauban.

Giangkon hinuon niya nga adunay grupong miduol kaniya lakip na ang partido ni Binay human sa isyu sa ilang kahimtang sa LP sa unang distrito.

Sa laing bahin, wa pay kompletong lineup ang Liberal Party sa ikatulong distrito sa probinsiya matud ni Bise Gobernador Agnes Magpale.

Si Magpale kinsa ubos sa Bakud Party subling mikompirma nga sa eleksiyon karong sunod tuig magpares gihapon sila ni Gob. Hilario Davide III.

Si Magpale mibutyag nga sa milabay’ng gabii nagpahigayon sila og preparatory meeting sa distrito niadtong Lunes sa gabii.

Gibutyag ni Magpale nga kompleto na ang lineup sa mga kandidato sa ikaduha, ikapito, ikalima ug ikaupat nga mga distrito. – /EIM) (BANAT NEWS)