Mga babaye gidasig mokandidato

CEBU, Philippines – Gidasig sa Commission on Elections nga mosalmot sa eleksiyon isip mga kandidato ang kababayen-an.

Kini ang tumong sa duha ka adlaw nga Gender and Development Seminar on Women and Elections nga gipahigayun sa Social Hall sa Kapitolyo sugod kagahapon aron paghatag og dugang kaalam kompiyansa sa kababayen-an aron sila maaghat nga mokandidato.

Ang mga opisyal sa lokal nga kagamhanan ang gipaubos sa mao’ng seminar.

Matud ni Provincial Election Supervisor Lionel Marco Castillano nga ang seminar lakip sa mga programa sa Comelec sa pag-empower sa mga babaye nga lokal nga kandidato ug napiling opisyal sa gobiyerno.

Nasuta sa statistics nga daghan ang mga botante’ng babaye apan diyutay lang ang mga kandidato ug napili.

Sa Mayo 13, 2013 nga automated national ug local elections, ang Rehiyon-7 adunay 1,730,585 nga registered voters nga lalaki samtang ang mga babaye miabot sa 1,815,605.

Nasuta nga ang mga lalaki nga nibotar niabot sa 1,389,553 samtang ang mga babaye 1,505,544.

Sa Sugbo adunay siyam ka kongresista kinsa pito kanila lalaki ug duha lang ang babaye.

Ang hunta probinsiyal adunay 12 ka sakop diin 11 niini mga lalaki ug usa lang ang babaye ug ika-duha ang bise-gobernador, ang mayor adunay 53 kabuok kinsa 47 mga lalaki ug unom lang ang babaye.

Adunay 1,203 ka kapitan sa barangay kinsa 932 niini mga lalaki ug 271 lang ang babaye samtang ang kagawad 8,421 ug 6,069 niini mga lalaki ug 2,352 ang mga babaye. – /GMR) (BANAT NEWS)