Negros Oriental ibuwag na sa PRO-7
CEBU, Philippines – Hingpit na nga mabuwag gikan sa Police Regional Office-7 ang Negros Oriental karong Oktubre ug masakop na kini sa PRO-18 kauban sa Negros Occidental nunot sa pagkamugna sa Negros Island Region.
Kini ang gipahibawo ni Supt. Renato Dugan, hepe sa Human Resources Office ug public information officer sa PRO-7 nga nahinabi sa mga tigbalita base sa kamanduan gikan sa Kampo Crame.
Si Dugan niingon nga sa kinatibuk-an aduna’y 8,775 ka polis ang sakop sa PRO-7 ug makuhaan kini og 1,359 kung mahimo na nga laing rehiyonal nga buhatan ang PRO-18.
Magpabilin na lang nga 6,396 ka polis ang PRO-7 nga giingong kuwang kaayo sa gidaghanon sa populasyon.
Sa pagkakaron gipasabot ni Dugan nga ang usa ka polis magbantay kini og 775 ka tawo nga unta ang angay nga ratio mao ang 1:500 kon usa ka polis sa 500 ka tawo.
Apan masaligon si Dugan nga sa umaabot nga han-ay sa mga aplikante sa pagka-polis sa PRO-7, mahulipan ra ang mawala nga sakop sa mao’ng buhatan.
Magpabilin ang probinsya sa Bohol, Siquijor ug Sugbo sa PRO-7. – /GMR) (BANAT NEWS)
- Latest
