Manipis di maagian sa mga sakyanan

CEBU, Philippines – Upat ka adlaw na nga wala naagii og mga sakyanan ang karsada sa sitio Languyun, Manipis, dakbayan sa Talisay human nidahili ang yuta ug mga bato nga nitabon sa kinatibuk-ang karsada niadto’ng Sabado sa kadlawon.

Lakip nga danyos sa mao’ng hitabo ang pagkaguba sa taytayan nga nagdugtong sa Talisay ug Toledo City.

Si Kapitan Emmie Cabiluna sa Manipis nitug-an nga kalit lang nga nagtagak-tagak ang yuta ug dagku’ng bato.

"Wa man unta’y uwan pero nikalit lang gyud nga nidahili ang yuta. Dili na gyud angay nga ikompyansa matag agi ini’ng bukira," matud ni Cabiluna nga nahinabi sa Banat News.

Asoy pa niya nga natipak og apil ang ila’ng taytayan human naigo sa daku’ng bato apan dili pa sila makaseguro ug unsa gyud ka grabe ang danyos tungod kay wala pa man mahilabti sukad kay nagsige pa gihapon og pangatagak ang yuta matag karon ug unya.

Si Allan Napoles nga taga barangay Biga, dakbayan sa Toledo ang mag-agian sa lugar matag adlaw tungod sa ka duol niini ikompara og adto sila moagi sa siyudad sa Naga. Apan gumikan sa mao’ng hitabo siya nahasol hasta ang iya’ng tibuok pamilya nga sa Tabunok mangompra.

"Paet kaayo ni oy labi na kay apike ato’ng budget sa inadlaw-adlaw makuhaan pa sa pletehan," nagkanayun si Napoles.

Si Cabiluna ang dali nga nipatawag sa iya’ng kaubanang konsehal ug nipagawas og budget aron ila’ng himoan ug hagdanan ang pang-pang sa kilid aron kaagian sa katawhan. Ang barangay nipalit og pisi nga kakuptan sa manaug sa ubos ug gihakhakan ang bungtod nga pwerte’ng subidahuna.

Si Raymond Silva, residente sa mao’ng dapit nga usa sa nitabang pagpahiluna sa kaagian sa katawhan, niingon nga motabang siya sa mga tawo nga maglisud ug agi’g pasalamat aduna’y mga tawo nga motunol niya og sinsiyo aron sab nga ipakaon sa iya’ng pamilya.

"Dili ra man pud mi mamugos nila basta lang dili sila mobuhi og bati nga estorya diri namo," asoy ni Silva.

Swerte ang panghitabo nga wala’y bisan usa nga motorista ang nataymingan nga niagi atol sa pagdahili sa bato ug yuta.

Nasayran nga ang lugar ka duha na naigo sa landslide apan dali ra’ng natagad ang una’ng panghitabo pinaagi sa abag sa contractor sa road widening project sa Department of Public Works and Highways.

Apan karong hitabo nga landslide, wala na nanghilabot ang QM Builders tungod sa pagka-expire sa ila’ng permit sa hauling.

Nagpatabang karon si Cabiluna ni Kongresista Gerald Anthony Gullas aron matagaan og dinaliang pagtagad ang ila’ng lugar ug ang paggasto sa danyos nga mugna sa trahedya.

Sila si Cabiluna ang adunay pahibawo nga dili paagian ang lugar nga gibutang sa dili pa sila motungas sa barangay Manipis. – /GMR) (BANAT NEWS)