Tulo ka bata patay sa dengue

CEBU, Philippines – Tulo ka bata ang namatay sa dengue sa tulo ka lungsod sa probinsiya gikan sa buwan sa Enero ug Septiyembre niining tuiga.

Kini maoy gibutyag ni James Cañete, provincial sanitary inspector IV, matud pa niya ang nangamatay nagpanuigon og 4, 5 ug 7-anyos ug mga residente sa lungsod sa Lilo-an, Minglanilla ug Alegria.

Karong buwana ang Provincial Health Office (PHO) dunay natalang 81 ka kaso sa dengue.

Gikan sa buwan sa Enero hangtud sa Septiyembre karong tuiga ang PHO dunay natalang 228 ka kaso sa dengue.

Ang top 3 ka mga lugar nga adunay daghang kaso sa dengue mao ang lungsod sa Argao nga dunay 101 ka kaso, Balamban, 74 ug dakbayan sa Carcar, 73 hinuon sa maong top 3 nga mga lugar walay natalang namatay.

Subay niini, sa kinatibuk-an sa milabay’ng tuig ang probinsiya dunay 1,479 ka kaso sa dengue diin lima ang patay.

Ang top 3 nga mga lugar sa milabay’ng tuig gilangkuban sa dakbayan sa Carcar, 253 ka kaso, lungsod sa Balamban, 167 ug Minglanilla, 107.

Matud ni Cañete nga ang pagsumpo sa dengue mao ang pagpuhag sa itlogan sa mga lamok ug ang paglimpiyo usab sa palibot.

Ang PHO mopahigayon kini og misting operation ngadto sa lugar nga dunay mga kaso sa dengue ug larvicide batok sa mga nguyo-nguyo. Si Cañete nagkanayon nga ang mga district hospital duna kini mga tambal nga makasanta sa dengue.

Ang Regional Epidemiology and Surveillance Unit  (RESU)-7 mibasol sa pagsige og uwan kun nganong misaka ang kaso sa dengue dinhi sa rehiyon.

Matud ni Rennan Cimafranca, pangulo sa RESU-7, kinahanglan mokooperar ang publiko sa ilang kampanya batok sa mga lamok.

Sumala pa niya dili mahimo nga ang Local Health Units ug mga  Local Government Units lang ang molihok batok niini.

Kini sama na lang sa paghipos sa hustong lugar ang mga basura  aron di mabara sa mga agianan sa tubig nga mahimong kapuy-an ug itlogan sa lamok.

Kun ang tawo dunay dengue pipila sa mga sintomas nga makita mao ang taas nga hilanat, joint pains, pagpanakit sa tiyan ug dili ganahan mokaon.

Ang uwahing nabiktima sa maong makamatay nga sakit mao ang magsuon nga sila Rhian Abegail, 8 anyos ug Mary Angeline Petaller, 5 anyos residente sa Sitio Ti-caban, barangay Pasil dakbayan sa Sugbo.

Matud sa inahan niini nga si Aileen Petaller, ang hilanat sa iyang mga anak nagbalik-balik, ug nakasinati usab sila og pagpanakit sa tiyan ug maglisod og ginhawa.

Diha lang nila nahibaw-an nga dengue ang sakit sa duha human sila niadto sa tambalanan apan uwahi na ang tanan kay namatay ang iyang mga anak.

Giawhag niya karon ang publiko nga dili mokompiyansa kun dunay hilanat ang ilang mga anak.

Nasayran nga base sa listahan sa RESU-7, gikan sa buwan sa Enero hangtod sa Septiyembre ang Central Visayas dunay 5,099 ka kaso sa dengue diin 25 niini ang namatay, mas taas kini og 25.4 percent kun itandi sa miaging tuig nga anaa lang sa 4,067 ka kaso ug 18 ang patay

Nag-una gihapon ang Cebu City sa labing daghan og kaso nga miabot og 789 ug tulo na ang patay; Lapu-Lapu City 212 ka kaso ug usa ang patay, gisundan sa Sagbayan nga 201 ug usa ang patay; Guihulngan nga 168 ka kaso; Dumaguete City dunay 164 ka kaso; Tagbilaran City 163 ka kaso; Toledo City nga anaay 154 dayon ang Mandaue City nga 134 ka kaso; Liloan nga 133 ug Consolacion nga miabot og 122. – /EIM) (BANAT NEWS)