Chinese nibaligya og pekeng tabon sa motor gipadakop

CEBU, Philippines – Gisikop sa mga sakop sa City Intelligence Branch sa Cebu City Police Office ang usa ka Chinese national nga negosyante nga gipasanginlan nga nameke ug usa ka produkto sa tabon sa lingkoranan sa motorsiklo.

Ang dinakpan mao si Yidang Chen, 36, taga Fujin, China ug temporaryo nga nagpuyo sa Benedicto Building, barangay San Roque ning dakbayan sa Sugbo.

Samtang ang reklamante mao si Iluminado Ornopia, tag-iya sa MS Motosuit and Device nga nagpakitabang sa kapulisan human kini nasayod sa pagpameke sa suspetsado.

Matud pa ni Inspector Gomersendo Mandawe ang deputy chief sa CIB nga nahinabi sa Banat News nireklamo si Ornopia kay ang iyang  produkto gibaligya man sa tindahan sa langyaw nga way pagtugot gikan kaniya.

Sumala pa ni Mandawe nakapakita og saktong dukomento ang negosyanteng si Ornopia nga siya ang naa’y katungod nga magnegosyo sa maong produkto.

Niadtong nakalabay nga hapon mihimo og test buy ang kapulisan sa tindahan sa langyaw diha sa Benedicto Building, V. Gullas Street ug nakapalit kini og usa ka seat cover nga produkto ni Ornopia ang pangalan.

Nakuha sa kapulisan gikan sa tindahan ni Chen ang 148 ka mga kinopya nga seat covers ug laing 150  pa ka kinopya gihapong seat covers nga lain-lain ang kolor.

Si Mandawe miingon nga karong adlawa mokuha sila og sertipikasyon sa Department of Trade and Industry (DTI) nga magpamatuod nga dili si Chen ang otorisadong makabaligya sa maong produkto nga mao’y ilang isukip sa pagpasaka og kaso sa dinakpan sa paglapas sa R.A 8293 o Intellectual Property Act. – /EIM) (BANAT NEWS)