Barangay kagawad gipatay

CEBU, Philippines – Patay dihadiha ang usa ka barangay kagawad  nga gitusak og bala sa usa ka lalaki samtang kini nakig-inom sa iyang amigo diha sa barangay Langub sa lungsod sa Argao sa nakalabay nga hapon.

Ang biktima mao si Victoriano Gomez Jr., 60,  kagawad sa barangay Samaguan sa maong lungsod.

Matud pa ni Senior Inspector Alejandro Batobalonos, ang hepe sa Argao Police nga nahinabi sa Banat News, naabot sa maong lugar ang maong konsehal kay kini misuroy sa iyang higala nga si alyas “Upaw.” Samtang nag-inom ang duha sa usa ka waiting shed usa ka motorsiklo ang miabot nga adunay sakay nga duha ka lalaki ug ang backrider maoy nanaog ug diretsong mipusil kang Gomez.

Si Batobalonos miingon nga base sa nakakita sa maong hitabo, wala nagtaptap sa nawong ang gunman ug ang drayber sa motorsiklo.

Matud pa ni Batobalonos, professional killer ang mipatay sa konsehal kay bisan layo pa kini sa gikahimutangan sa konsehal nagsugod na kini og pusil samtang naglakaw paduol sa biktima.

Sigun pa sa hepe sa Argao nga sa unang buto sa armas naigo na dayon ang konsehal sa iyang lawas. Misulay pa unta kini paglayat sa waiting shed apan nasangit siya sa bangko ug didto gitiwasan sa pagpusil sa nawong. Ang amigo sa konsehal nga si alyas Upaw ang nakahigayon pa og layat sa pakilid nga bahin sa waiting shed ug nakasibat.

“Misulay pa gyud unta og layat kini si konsehal pero nasangit sa bangko kay murag wala nato siya’y kusog kay naigo naman gud siya,” matud pa ni Batobalonos.

Nagtuo si Batobalonos nga dili taga Argao ang mipatay sa konsehal kay kompiyansa ra man kaayo kini nga nagpakita sa ilang mga nawong.

Walo ka basiyo sa kalibre .45 ang nakuha sa kapulisan sa crime scene nga gituohang gigamit sa gunman ug daghang samad pinusilan sa lawas ug nawong sab ang naangkon sa konsehal nga nabugtoan sa iyang kinabuhi.

Si Batobalonos miingon nga sa wala pa nahimong konsehal si Gomez niadtong dekada 90 nakapatay kini og polis hinungdan nga nabilanggo kini sa Muntinlupa apan nakagawas ug nahimong konsehal sa barangay sud sa tulo ka termino.

Apan usa sa gisubay karon sa kapulisan mao ang ilang gipasaka nga kaso batok sa nagpatay sa anak sa biktima nga napusilan patay sa hantakan sa lungsod sa Sibonga niadtong nakalabay nga tuig.

“Ongoing ang kaso nila batok atong nagpusil patay sa iyang anak didto sa Sibonga, usa ni sa atong gitan-aw nga posibling hinungdan, although sa personal motive apil pud na sa atong gitan-aw. Basta naa’y mga sugal lagmit moadto gyud ni siya, mao na gyud ni ang naandan niya,” saysay pa ni Batobalonos.

Gisalikway usab ni Batobalonos nga politika ang motibo sa pagpatay sa biktima kay wala kini nakontra ug halos mga paryente ra niya ang mga anaa sa posisyon ug iyang mga higala sa barangay. – /EIM) (BANAT NEWS)