Barangay sa Aloguinsan may bag-ong patubig

CEBU, Philippines - Bag-ong water system sa barangay Angilan sa lungsod sa Aloguinsan sulbad sa problema sa 75 ka panimalay nga makabaton og limpyong tubig.

 Ang kagamhanan sa probinsiya migasto og P400,000 sa maong proyekto nga giinugurahan niining ulahi lang.

Gawas sa maong mga panimalay nakabenepisyo usab niini ang Angilan Elementary School nga gilangkuban sa 600 ka estudyante ug 15 ka magtutudlo.

Ang kapitan sa barangay, Lorenzo Mainit mapasalamaton sa kagamhanan sa probinsiya nga nakabaton na sila og submersible pump diin dugay na kaayo nila kining gipangandoy.

Usa sa beneficiary nga si Marcel Obtina nagkanayon nga dili na sila magsag-ob og tubig ngadto sa layo tungod kay naa na silay tubig diha sa duol.

Matud niya nga bisan og huwaw kusog kaayo ang agas sa ilang tubig.

Subay niini, si Bise Gobernador Agnes Magpale mihangyo sa mga residente sa pag-amping sa ilang submersible pump aron kini molungtad og dugay.

Mipadayag usab siya sa iyang plano sa paghatag og water tank sa barangay aron daghan pa ang mga pamilya nga makabenepisyo sa tubig.

Sa laing bahin, si Bokal Alex Binghay nagkanayon nga dako kaayo og mahimo nga kaayohan alang sa katawhan kung ang mga opisyal magtinabangay kini.

Ang kagamhanan sa lungsod nakigtinabangay usab kini ngadto sa probinsiya aron mahatagan og katumanan ang pangandoy sa mga residente sa lugar nga makabaton og water system.

Si Merlita Milgo, treasurer sa  barangay mibutyag nga duna silay binuwan nga koleksiyon sa bayad sa tubig diin ilaha kining gamiton sa maintenance sa water system. (BANAT NEWS)