Davide: Hospital, tambal libre

CEBU, Philippines - Gipasalig ni Gobernador Hilario Davide III sa mga Sugbuanon nga libre ang hospital ug tambal sa mga kabus.

Si Davide nagkanayon nga ang 16 ka district hospitals sa nilabay’ng duha ka tuig sa iya’ng administrasyon ang napauswag na.

Ang probinsiya nipatuman sa “Point of Care Program” sa Philippine Health Insurance Corporation (PHIC) diin ang mga kabus nga pasyente makabenepisyo sa libre’ng hospitalization o wala’y magawas nga kwarta gikan sa ila’ng bulsa.

Si Davide sa iyang State of the Province Address (SOCA) nga gitawag og Report to the People sa nilabay’ng buwan nibutyag nga 566 ka walk-in nga kabus nga pasyente ang na-enroll na sa programa.

Ang medical social welfare mopahigayon og interview sa pasyente aron madeterminar ang ila’ng kapasidad.

Ang pasyente nga dili makaabot sa pagbayad sa hospital awtomatik nga ma-cover sa programa.

Sa pagkakaron ang probinsiya adunay lima ka health facilities nga na-classified isip level 1 hospitals nga buot pasabot nga ang mao’ng hospital dili lang basic health services ang mahatag kun dili lakip na ang specialized health care services sa surgery, OB-Gynecology, internal medicine, pediatrics ug anesthesia.

Ang ulahi’ng health facility nga na-upgraded ngadto sa level 1 status mao ang Cebu Provincial Hospital sa lungsod sa Balamban.

Sama sa ubang level 1 provincial hospital sa dakbayan sa Bogo, Danao, Carcar ug Isidro C. Kintanar Memorial Hospital sa lungsod sa Argao nga usa ka district hospital, ang mao’ng mga hospitals mopahigayon kini og major surgical operations sama sa caesarian section, exploratory laparatomy, thyroidectomy, appendectomy, hernia repair ug uban pa’ng surgical procedures.

Dugang niini, si Davide nisaad sa pag-upgrade sa 16 ka district hospitals nga mahimo kini’ng level 1 health facilities nga maka-handle og emergency surgical procedures.  (BANAT NEWS)