One Cebu lig-on sa Liloan

CEBU, Philippines - Pabiling lig-on ang One Cebu Party ug Democracy of the Independent Liberal Conservative (DILC) sa lungsod sa Liloan bisan sa pagbiya ni Bise Mayor Lucelito Pilapil sa grupo.

Kini ang gipadayag ni Mayor Vincent Franco “Duke” Frasco human nitapon si Pilapil sa Barug Alang sa Kauswagan ug Demokrasya (Bakud) Party sa ikalima’ng distrito diin sakop ang lungsod.

Matud ni Frasco nga nagpabilin sa One Cebu ug DILC ang walo nila ka konsehal, mayoriya sa mga barangay kapitan ug sa kinabag-an sa mga Liloanons nga nakatagamtam sa nahimo sa administrasyon.

Sumala pa ni Frasco nga  niadto’ng Mayo nipadayag si Pilapil nga magpabiling bise mayor sanglit anaa pa siyay duha ka termino.

Apan niadtong Hunyo, matud ni Frasco nga gipahibawo siya sa iyang kasaligang lider nga nausab ang hunahuna ni Pilapil hinungdan nga nagpaabot siya nga ang bise mayor mismo ang mopahibawo kaniya apan wala nahitabo.

“Sa una nakong pagdagan niadtong 2007, ako siyang giimbitar sa among partido ug nag-uban mi sa akong tulo ka termino. Tungod kay ang akong tuyo ang pagpanerbisyo, layo sa akong hunahuna ang pamolitika. Beyond the lines of politics, I always considered Vice Mayor Lito a friend, so I thank him for his support in the past, and I wish him well,” matud ni Frasco.

Dugang ni Frasco nga mangita sila og laing kandidato sa pagka-bise mayor atbang ni Pilapil samtang wala pa niya gipahibawo kung kinsa ang modagan sa pagka-mayor sanglit katapusan na niya nga termino.

Gihugunhugonan nga ang asawa ni Frasco nga si Atty. Christina Garcia-Codilla Frasco kinsa anak ni kanhi gobernador Gwendolyn Garcia ang modagan sa pagka-mayor.  (BANAT NEWS)