P378 mil shabu nasakmit
CEBU, Philippines - Human nga nasakmit sa PIB ang kapin sa P300 mil nga drugas sa miaging adlaw sa dakbayan sa Danao, laing P300 mil nga kantidad sa drugas na usab ang nasakmit sa kapolisan sa Danao kagahapon sa hapon.
Ang maong operasyon gipahigayon sa Bonifacio Extension, barangay Poblacion 1 miresulta sa pagkasikop kanila ni Richie Tan, gidudahang drug pusher, Daryl Prieto, 37, Denver De la Rama, 31, ug Avelino Landero, 23.
Gamit ang P200 nga buy-bust money gipalitan sa polis ang suspek og usa ka pakete nga shabu ug dihang gitunol niini ang shabu ug midawat sa buy-bust money gisikop dayon siya sa mga operatiba.
Sila si Prieto, De La Rama, ug Landero gidakop sab sa kapolisan tungod kay naabtan sila sud sa balay sa suspek atol sa operasyon.
Dihang gisusi sa kapolisan ang mga nadakpan nakuhaan nila si Tan og usa ka medium sized, siyam ka gamay nga pakete nga shabu ug ang buy-bust money.
Samtang nakuhaan sab si Prieto og tulo ka pakete nga shabu, si De La Rama nakuhaan sab og tulo samtang si Landero nakuhaan og duha ka pakete nga shabu. Ang nasakmit nga drugas mokabat og 32 gramos nga mobalor og P378 mil.
Ang mga suspek kasamtangang nadetiner sa Danao City Police Station samtang giandam pa ang pagpasaka sa kasong kalapasan sa Comprehensive Dangerous Drugs Act of 2002. (BANAT NEWS)
- Latest
