Nagparehistro naghugop na

CEBU, Philippines - Gihugupan sa daghang tawo nga nagtinguha sa pagparehistro ang buhatan sa Commission on Elections sa dakbayan sa Mandaue nunot usab sa nagkaduol na nga adlaw sa pagtapos na sa pagpangrehistro.

Si Atty. Fleur Ann Gujilde, City Election Officer, niingon nga sa nangagi’ng mga buwan mao’y ila’ng marehistro ang kapin sa 100 ka tawo.

Daku na kini’ng sukwahi niini’ng buwan sa Septiyembre tungod kay ila’ng namatikdan ang paghugop sa daghang tawo nga nagtinguha sa pagparehistro alang sa ilang pagbotar sa 2016 lokal ug nasudnong piniliay.

Gitataw ni Gujilde nga sukad sa Oktubre 2014 nga maoy pagsugod sa pagpangrehistro hangtud sa buwan sa Hulyo karong tuiga, mao’y ilang natala ang 186,104 ka mga narehistro nga botante sa dakbayan.

Dugang pa niya nga mosaka pa gyud ang mao’ng gidaghanon sa mga narehistro’ng botante hangtud na unya sa ila’ng pagsira sa sunod buwan.

Nunot niini giawhag ni Gujilde ang mga narehistro na nga mga botante sa pagsusi sa ila’ng biometrics sa pagseguro nga makabotar sila sa 2016 elections.

Si Gujilde niingon nga kadto’ng mga nagplano nga mokandidato sa 2016 elections labing maayo nga ila’ng susihon ang kasamtangang estado sa ila’ng rehistro sa paglikay sa mahitabo’ng kakulian.

Matud ni Gujilde nga kasamtangan karon nila’ng gihimo ang paghatag og kasayun alang niadto’ng nagtinguha sa pagparehistro pinaagi sa ila’ng pagpahimutang sa mga malls sa dakbayan sa matag adlaw.

Si Gujilde niingon nga ang 18,193 nga narehistro’ng botante sa ila’ng buhatan ang wala nakakuha og biometrics hinungdan nga nangayo sila og tabang sa mga opisyal sa barangay sa pag-house-to-house sa pagpahibawo sa mga hingtungdan nga mga botante sanglit kun mapakyas sila dili mahimo’ng makabotar sa 2016 elections.  (BANAT NEWS)