Val nahiubos budget sa piyesta gilaslasan
CEBU, Philippines - Nahiubos si Konsehal Valeriano Ylanan sa iya’ng kaubanan sa paglaslas sa budget alang sa kapistahan diin siya ang tsirman sa komitiba sa turismo.
Apan tubag sa iya’ng kaubanan mao nga may budget o wala, wala gihapon kini kapuslanan kay ang tagaan og pagtagad mao man ang pagpanguha og job order nga kawani.
"Dili makiangayun ang siyam nako nga kauban sa paglaslas nila sa budget alang sa pista nga gikan sa P3.5 milyones ngadto na lang sa usa ka milyon ka pesos," matud ni Ylanan. Asoy pa niya nga sa dili pa siya ang tsirman, wala kini laslasi apan karon nga siya na gilaslasan na kini.
Apan sila si Konsehal Aldin Diaz ug Doroteo Emit nga mao’y nangulo sa kalihukan kaniadto nipasabot nga bisan og P3.5 milyones ang budget niini apan wala sila nakatandog tungod sa rason nga wa kini gihatag sa mayor ngadto kanila. Sa iya’ng bahin si Konsehal Socrates Fernandez nidugang nga ang kalingawan nga gipasabot ni Ylanan ang wala kinahanglana tungod kay naghimo lang kini’g bati nga ehemplo sa mga bata kay kini'ng kalingawan niya pulos sugal.
"Kay ngano man dili diay mahinayon ang pista kun wala'y budget? Kay kini usa ka relihiyoso’ng kalihukan ug dili kini kalingawan," asoy ni Fernandez. Ang dakbayan sa Talisay magsaulog sa ila’ng kapistahan karong Oktubre 15 sa ila’ng patron nga si Sta. Teresa de Avila.
Gani niwitik pa gyud si Fernandez sa iya’ng kahibulong nga ang laing tinuohan ang kalit lang nga mahiligon og kalingawan subay sa kapistahan.
Samtang si Bise Mayor Romeo Villarante ang niklaro nga ang budget gilaslasan tungod kay wala man mapunta sa katuyuan nga mao gyud ang kalihukan sa piyesta. Sa ila’ng pakisusi, gigamit ang budget sa piyesta sa pagkuha og mga job order employees. (BANAT NEWS)
- Latest
