Himuong AI technician mga regular

CEBU, Philippines - Tinguha sa Department of Agriculture nga regular nga kawani sa local government units ang mahimo’ng technician sa artificial insemination program.

Kini aron magpabilin sa trabaho bisan mag-ilis-ilis ang administrasyon.

Matud sa regional coordinator sa DA-7, Rudito Mumar, nga ubay-ubay sa ila’ng mga technician nga napaubos sa training nga gigastuhan og daku apan nailisan diha’ng nag-ilis og administrasyon hinungdan nga maapektuhan ang produksyon sa pagpadaghan sa kahayopan sama sa baka, kanding ug baboy.

Dugang ni Mumar nga pipila lang ka mga technician sa artificial insemination ang anaa sa DA-7 hinungdan nga laraw na usab nila nga mopahigayon og laing training sa mga permanent employees.

Base sa talaan sa DA-7 nga aduna’y kalungsuran sa Central Visayas nga wala’y technician nga gitahasan sa artificial insemination. Gihingusgan sa DA ang artificial insemination sa kahayopan nunot sa climate change.

Giawhag ang mga mag-uuma ilabi na kadto’ng adunay mga binuhi sa paggamit sa artificial insemination diin dili na kinahanglan pa mobuhi og toro o laki’ng binuhi tungod kay ipaagi na lang sa similya sa hybrid nga liwat nga giandam sa National Breeding Center sa Bukidnon.

Matud ni Mumar ang mga binuhi nga gikan sa artificial insemination mas taas og resistensiya hinungdan nga dili kini dali’ng masakit.

Sa Sugbo, sa nilabay'ng tuig adunay kapin 100 mil ka baka, 47 mil ka kabaw, kapin sa 400 ka baboy ug kapin sa 200 mil ka kanding ang produksiyon sa artificial insemination. Gipasalig ni Mumar nga ang unod sa kahayopan nga gipaagi sa artificial insemination susama ra sa gikan sa natural nga paagi ug dili kuyaw kan-on sa tawo. (BANAT NEWS)