Nag-duelo pulos angol

CEBU, Philippines – Pulos nalandig sa tambalanan ang duha ka lalaki human kini nag-duelo og pinusilay sa Sitio Paradise 3, Kinasang-an, dakbayan sa Sugbo pasado ala una sa nakalabay nga kadlawon.

Ang duha giila nga sila si Boby Babor, 42, may kapuyo, nagpuyo sa mao’ng dapit ug Marlon Fegarido, 51, taga Sitio Tabok-Kanal, Pardo.

Matud ni Senior Police Officer 1 Ruth Violango, imbestigador sa homicide section sa Cebu City Police Office, nga nahinabi sa Banat News nga samtang nakig-estoryahanay sa iya’ng silingan si Babor kalit lang naabot si Fegarido ug nangita sa naulahi.

Pipila ka segundos ang nilabay nagkalalis ang duha nga pulos armado og mga revolver nga dungan sab nga nilanit dayun pusil.

Igo sa suwang ang naangkon ni Babor nga gidala sa Vicente Sotto Memorial Medical Center (VSMMC) samtang duha ka igo sa dughan ug ubos sa dunggan ang naangkon ni Fegarido nga gidali sab pagdala sa Cebu City Medical Center (CCMC).

Sumala pa ni Violango nga sigun sa mga nakakita sa hitabo pareho ang gidaghanon sa napabuto sa duha atol sa pinusilay apan mas daghan og napaigo si Babor.

Swerte na lang nga wala’y naamong nga laing tawo sa mao’ng hitabo.

Nasayran sab sa kapolisan nga buntag pa lang naglalis na ang duha sa wala masayri nga hinungdan ug pagka-kadlawon nibalik sa mao’ng dapit si Fegarido.

Si Violango niingon nga ang duha pulos arestado sa kaso’ng paghupot og ilegal nga armas kay pulos wala’y lisensya ang ila’ng mga revolver.

Samtang sa kaso sa frustrated murder, padayun pa nga giimbestigar sa kapolisan aron pagsubay kung kinsa ang angayan nga manubag. – /GMR) (BANAT NEWS)