ATM hacker nadakpan
CEBU, Philippines – Nadakpan sa mga sakop sa City Intelligence Branch (CIB) sa Cebu City Police Office ang usa ka Romanian nga gidudahang sakop sa usa ka sindikatong grupo sa mga hackers didto sa Uropa.
Ang suspek nga si Gheorghe Adelin Stretcu, 32, nagtrabaho sa Airport of Romania isip economist.
Matud pa ni Superintendent Romeo Santander, hepe sa CIB nga nahinabi sa mga tigbalita nabisto ang suspek dihang nakabantay ang usa ka gwardiya sa usa ka bangko nga adunay automated teller machine sa kadudahan niining lihok.
Sumala pa nga nahibulong ang gwardiya nga dugay kaayong nahuman ang suspek kay daghan kaayo kini og gidala nga mga cards nga iyang gipuli-puli og paslak sa ATM. Tungod niini, mitawag sa kapolisan ang gwardiya ug gisikop ang maong langyaw.
Nahibaw-an nga mang-hack og mga bank accounts didto sa Uropa ang grupo ug si Stretcu maoy gitahasan mo-withdraw dinhi sa ilang mga ma-hack didto.
Ang mga reward cards maoy gihimong ‘card’ ni Stretcu nga gibutangan sa kinopyang account aron gamiton sa pag-withdraw. Nakig-alayon na ang kapulisan sa konsulada sa Romania, buhatan sa Bureau of Immigration ug International Police.
Ang langyaw gikatahong naabot dinhi sa nasud niadtong petsa 17 ning bulana. – /EIM) (BANAT NEWS)
- Latest
