Pag-ulan epekto sa ITCZ –Pagasa Mactan
CEBU, Philippines – Ang nasinati karong pag-uwan dinhi sa Kabisay-an ug ubang bahin sa Luzon ug Mindanao epekto sa inter-tropical convergence zone (ITCZ).
Gawas niini, usa ka weak low pressure area (LPA) usab ang gi-monitor sa Pagasa-Mactan nga gipanglantawang mosulod sa Philippine Area of Responsibility (PAR) karong adlaw’ng Miyerkules.
Kun mokusog pa ang maong LPA posible nga mahimo kining bagyo karong buwana ug tawgon kini nga bagyong Jenny.
Matud ni Al Quiblat sa Pagasa- Mactan nga nitala og 217 mm nga sukod ang ulan sa nangaging mga adlaw nga mas kusog itandi sa normal nga pagbunok sa uwan karong bulana nga 179.1 mm. Gipaabot nga mas mokusog pa g’yud kini sa umaabot nga mga adlaw.
Gumikan niining sagunson nga pag-uwan giawhag ni Quiblat ang publiko nga gamiton ang kahigayunan nga magtigom og tubig.
Base sa Project NOAH nga anaa na sa 2.3 degree Celsius ang temperatura karon sa kadagatan sa Pasipiko ug nagpasabot kini nga hinayhinay nang naporma ang El Niño nga susama kainiton sa nasinati niadtong 1980. – /EIM) (BANAT NEWS)
- Latest
