Litrato ni Montebon di na ipa-share sa FB

CEBU, Philippines – Ang Hunta Probinsyal miawhag sa mga netizens sa social media nga respetuhon ang pamilya sa 17-anyos nga tinun-ang gipatay pinaagi sa paghunong na pag-share ug pag-post sa matud pa hulagway sa biktima.

Ang mga sakop sa Hunta Probinsyal mipagawas og resolusyon nga nag-awhag sa katawhan nga di na i-post o i -share sa social networking sites sama sa Facebook ang mga hulagway nga gituohang nakuha diha sa crime scene nga nagpakita sa makaluluoy nga sitwasyon ni Karen Kaye Montebon.

Si Board Member Arleigh Sitoy maoy nangamahan sa resolusyon miingon nga angay usab tan-awon kun unsay bation sa mga ginikanan ug mga mahal sa kinabuhi ni Karen niining nagpataka na lang og share sa hulagway sa ilang anak.

Ang maong hulagway gituohang nakuha sa usa sa mga nanguryuso diha sa crime scene sa dihang wa pa mangabot ang mga polis.

Matud pa nga dihang nakaplagan sa amahan ni Karen nga si James ang anak dali niya kining gidala sa tambalanan apan didto gideklarar kining patay na.

Gipahibaw ni Sitoy nga ang mga lokal nga kagamhanan adunay kaakohan sa ilang mga konstituwente nga kinahanglang magpuyo nga adunay moralidad.

Atol sa regular sesyon kagahapon giaprubahan usab ang resolusyon ni Board Member Joven Mondigo Jr. nga nag-awhag ni Cebu Provincial Police Office Director Noel Gillamac nga motabang sa pagpangita sa mga mamumuno ni Montebon. – /EIM) (BANAT NEWS)