Mga polis gihatagan og cash incentive
CEBU, Philippines – Miabot og P2.1 milyones ang gipanghatag nga cash incentive sa Kapitolyo ngadto sa 40 ka polis nga sakop sa Cebu Provincial Police Office (CPPO) tungod sa ilang malampusong operasyon batok sa ilegal nga drugas.
Si Joey Herrera, hepe sa Cebu Provincial Anti-Drug Abuse Council (CPADAC) mibutyag nga sulod sa unom ka buwan niining tuiga dunay 11 ka operasyon ang kapolisan batok sa ilegal nga drugas.
Siyam niini gihimo sa CPPO ug duha sa kapolisan sa lungsod sa Balamban. Ang incentive gikuha gikan sa budget sa CPADAC alang sa ilang mga operasyon.
Karong tuiga ang CPADAC gigahinan og P5 milyones nga budget. Si Gobernador Hilario Davide III misaad nga dugangan og budget ang CPADAC.
Ang mga polis makadawat og incentive gikan sa P3 mil ngadto sa P15 mil. Ang daghan og nauban nga operation mas daku og madawat.
Mapasalamaton kaayo si Cebu Provincial police director Noel Gillamac sa pagsuporta sa kagamhanan sa probinsiya ngadto kanila kay makapakugi pa kini sa mga polis.
Si Provincial Board Member Ivy Durano-Meca, vice chairman sa CPADAC, nagkanayon nga ang pagpanghatag og incentive mao ang usa sa pamaagi sa pagpasalamat sa kapolisan. – /RUB) (BANAT NEWS)
- Latest
