Undanong balita sa media

CEBU, Philippines – Kuwang kaayo ang mga tawo nga nagtrabaho sa media aron pagsabwag og undanong mga impormasyon ug balita tungod sa nagkadakong “audience” niini karon dihang nadugang ang gitawag nga mga “netizens.”

Kini maoy paghulagway sa abogado ug pari nga si Fr. Domingo “Dan” Delos Angeles kinsa mao ang nagselebrar sa Santos nga Misa sa ika-21 nga Cebu Press Freedom Week kagahapon.

Ang netizens lahi sa naandang tigsunod sa mga balita ug impormasyon kay sila wala na magtutok sa radyo, telebisyon ug sa mga pamantalaan. Gihimo nilang medium ang internet tungod sa nagkasikat karong mga social media networks.

Kini maoy hinungdan nganong ang nagkadaiyang outlets nabag-ohan ug kinahanglang makaapas niini nga bag-ong gikahiligan karon sama sa mga trendings, online news reporting ug uban pa.

Apan matud pa ni Fr. Delos Angeles nga mas naila sa tawag nga Fr. Dan, kinahanglang dili kalimtan ang responsableng paggamit sa internet pinaagi sa pagsiguro nga undanon ang sinuwat sa mga sakop sa media.

Sumala pa niya, ang paghimo kang Kristo isip unod sa balita, maoy yawe sa mga tigbalita aron mamahimong undanon, dunay pagtulon-an, ug puno sa kamatuoran ang mahatag ngadto sa publiko.

Matud pa ni Delos Angeles, ang pagsaulog sa Press Freedom usa ka kahigayonan sa mga nagtrabaho sa media nga mosusi sa ilang kaugalingon kung unsa sila ka epektibo sa ilang trabaho.

Ilabi na sa bag-o karong panahon nga aduna nay mga bag-ong pamaagi sa pagsabwag sa balita sama sa internet, nagkinahanglan og dugang pagtagad sa industriya sa media alang sa mas responsableng pagpakatap og balita ug impormasyon.

Kauban ni Delos Angeles atol sa pagpahigayon sa Santos nga Misa mao si Fr. Roberto M. Ebisa ang general manager sa DYRF/Power FM, nga diin gitambongan gikan sa tanang mga sakop sa media, ma-print man, television ug radio.

Ang Santos nga Misa gipahigayon, human sa parada nga nanukad sa Plaza Independencia padulong sa SM Tradehall, diin human sa Eucharistic Celebration, gipahigayon gilayon ang presentasyon alang sa “Star of the Show” gikan sa Freeman/Banat News, Cebu Daily News ug Kapisanan nang mga Brodkaster ng Pilipinas.

Aduna say gihimong pa-raffle nga naglakip sa tulo ka back-and-forth ‘trip-tickets for two’ ngadto sa Taiwan; Incheon, South Korea; ug Narita, Japan ug uban pang mga papremyo.

Nigawas nga mananaog sa ikatulong pwesto ang CDN, ikaduha ang The Freeman-Banat News ug ang kampeyon mao ang defending champion KBP.

Mga nagkadaiyang raffle prizes ang gipanghatag atol sa raffle draw, diin dunay niuli nga malipayon ug duna usab magul-anon kay walay nabitbit, apan puno ra gihapon sila sa pagmaya tungod sa pormal ug malampuson nga pagbukas sa usa ka semana nga kalihukan. – /EIM) (BANAT NEWS)