Cellphone nakamugna og sunog

CEBU, Philippines – Gi-charge nga cellphone nalimtan og ibot diha nga fully-charged na mao nga mi-overheat ug nakamugna’g sunog nga miulbo sa usa ka balay didto sa Poblacion, Samboan kaniadto’ng Sabado sa buntag.

Swerte nga wala mahurot pagkaugdaw ang balay sa magtiayong Mars ug Elena Villarin, 49, human nga miulbo ang sunog sa alas 10:20 sa buntag.

Si Fire Officer-3 Leo Andicoy sa Ginatilan Fire Station miingon nga nadawat nila ang alarma sa alas 10:20 sa buntag ug tungod kay lima ka kilometro pa ang gilay-on sa Samboan, napawong na ang kayo sa mga silingan sa ilang pag-abot.

Matud ni FO3 Andicoy nga gibana-bana nga miabot g'yud og P30 mil ngadto sa P50 mil ang danyos sa maong sunog. Sa pakisusi, nasuta nga ang nabiyaan nga cellphone nga gi-charge maoy hinungdan sa sunog.

Didto ra sa kuwarto sa magtiayon ang grabe’ng naapektahan sa sunog nga nagsugod sa outlet diin gi-charge ang cellphone.

Matud pa nga na-overcharged ang cellphone hinungdan nga nag-short circuit ang linya sa kuryente ug miulbo ang kayo human mikuyanap sa wiring sa balay.

Ang lungsod sa Samboan wala’y kaugalingon mga fire station ug mga bombero mao nga magsalig lang kini sa kabomberohan sa kanait nga lungsod sa Ginatilan. – /RUB) (BANAT NEWS)